An repons a: Ki jan nou ekri kreyòl ayisyen Marilyn Mason te ekri a,
Jean-Robert Placide afiche mesaj sa, jou 08 Avril 2002 a 14:01:22:
Kòmantè sou tèks Woje Saven anAk tout onè respè nou gen pou Woje Saven, nou ta renmen note kèk remak sou tèks msye fè parèt nan fowòm nan.
1- Nan lis fonèm òtograf ofisyèl la, gen 11 vwayèl.. Tandiske, nan tèks li a, Woje Saven di se 10 vwayèl ki genyen. Li pa mansyone vwayèl nazal: oun. Tcheke Òtograf ofisyèl la ki ni sou REKA, ni sou Windowsonhaiti tou .
Menm jan ak Dejan, Saven bliye fonèm vwayèl oun ( / ũ / ) ki chita nan nenpòt pozisyon, nan anpil mo kreyòl tankou : oun, youn, bounda, santi foun, foundòk, founda, foundanman, hounsi, hounfò, houngan, houndjenikon, hountò, hountòdji, hounble, adjahountò vodoun, ( vodhoun, vohoun ), kandjanhoun, ogoun, bohoun ... Tcheke tèks Meji, Mivil, Plasid ... manm Sosyete Koukouy.
Sanble pou anpil moùn, profesè, lengwis, ekriven ou non, yo vle pou ekriti kreyòl la ta etimolojik, piske se sèlman nan mo Lafrik yo, nan mo vodoun yo sèlman yo vle pou oun kole fè / ũ / ? Nou pa dakò ditou ak mòd pozisyon sa yo.
2- Saven konfonn fonksyon aksan grav la avèk fonksyon aksan fòs la, 2 gwo pwen majè ki nan baz sistèm òtograf ofisyèl kreyòl la. Nou te deja esplike sa.
Aksan grav se youn siy dyakritik ( ` ) ki sèvi nou pou nou ditenge 2 fonèm: e avèk è, oubyen o avèk ò. Men pa a avèk à.
Aksan fòs se youn siy dyakritik, ( ` ) ki sèvi nou pou nou demakònen de lèt : oun lèt vwayèl ( a, e, i, o, ou ) avèk lèt konsòn ( n ) ki suiv li a, pou yo pa kole ansanm pou ta reprezante yon siy vwayèl nazal. ( Bilten koukouy, jen 96, No 9 )
Piske aksan fòs la avèk aksan grav la gen menm fòm, ( ` ), èske nou pa ta ka chèche youn lòt fòm, youn lòt siy pou aksan fòs la ? èske nou pa ta ka konsidere pwopozisyon trema Jano Ilè a, oubyen propozisyon aksantegi Franketyèn nan ?
3- Kontrèman ak Saven, nou di gen youn lèt ( u ) nan òtograf ofisyèl kreyòl la. Nan sistèm ekriti kreyòl la, lèt ( u ) se youn siy pou reprezante fonèm / ч / ki se youn semivwayèl. N' ap jwenn li nan youn pè mo depaman tankou :
Kui = materyèl ki sèvi pou fè soulye, sak. Egzanp: soulye an kui, sak an kui
Kwi = resipyan ki fèt avèk oun mòso, osnon youn bò kalbas.Jan Wobè Plasid
Pwofesè kreyòl, manm Sosyete Koukouy Seksyon Kanada