60 Milyon Fran osnon 90 Milyon osnon 150 milyon

[ Kesyon Moun Mande Anpil ]

An repons a: Nap tounen pwatann ak pwomes transparans lan Guy S. Antoine te ekri a,

Jaf afiche mesaj sa, jou 18 Jwen 2002 a 13:47:57:

Onè kanmarad,

Guy mwen konprann fristrasyon ou lè ou li mesaj Manzè Zili a. Men, fòk nou on ti jan endiljan youn ak lòt paske mwen pa kwè se machanste ki alabaz mezantant sa a. Se vre Manzè Zili sote nan kòlèt ou malman paske lè mwen li mesaj ou a tousuit mwen te konprann ke ou pa tap janm fè okenn eskiz pou Lafrans alevwa pou ou ta pèdi kap pou ou ta rele yo «Papa bonkè». Men, pa bliye mwenmenm ak ou nou gen anpil ane depi n ap kominike sou dosye sa a epi mwen konnen jan pozisyon ou djanm sou lakesyon.

Antouleka, annou retounen sou kesyon done istorik ekzak ke nou bezwen osijè zak zenglendinaj Lafrans te fè an 1825 lan. Jan ou di a Wa Lafrans lan te mande 150Milyon Fran epi Prezidan Boyer te aksepte peye 150 milyon Fran. Men, lè dènyè kòb ki te ale jwenn Lafrans lan fin konte se yon montan pi piti li te ye. Gen yon kote mwen te li 90 milyon, epi ayè mwen wè yon sit entènèt ki di se te 60 milyon fran. Si nou vlewè atik sa a, ale nan Google epi fè yon rechèch sou «Prix du Sang Georges Lafare» ki parèt nan jounal Le Web de l'humanité».

Mwen dakò 100% ak ou lè ou di deremete lajan sa a, kit se 60, kit se 90 milyon, se pap yon reparasyon. Men se yon ka kote Ayiti ap fòse Lafrans «DEREMETE» li sa li te vòlò nan men li. Kounye a, anplis de lajan sa a ke Lafrans va deremete Ayiti. Gen dwa genyen REPARASYON pou domaj pèp Ayisyen sibi akòz li pat gen lajan sa a aladispozisyon li pandan tout tan sa a pou li te ka finanse devlòpman li. E la a, nou tonbe nan anpil koze pou avoka ta debat. Kidonk, fòk koze yo pa melanje.

Gen
1) DEREMETE montan ekzak yo te vòlò a (60 milyon Fran pou pipiti) - ak konsiderasyon pou enflasyon

2) REPARASYON pou domaj + enterè

epi yon lòt koze apa ki pa gen anyen arevwa ak zak zenglendinaj 1825 lan

3) REPARASYON pou KRIM leta Franse komèt kont Afriken zansèt nou yo ki t ap chawaye pou yo sou zile a pandan plizyè santenè.


Mezanmi, annou kontinye dyalòg la kè kal epi annou fè efò pou nou pa mal dirije fristrasyon nou devan enkredilite diijan nou yo epi mechanste MoUnPa pou se ta youn k ap fè vyolans vèbal sou lòt. Noumenm nan lakou sa a se fanmi nou ye. Nou pap kite sa rive nou grasa lizaj Ginen yo.

Ayibobo!

Jaf

Repons sou sijè sa: