Kouman Ayiti ap janm soti anba lankètsepousui?

[ Kesyon Moun Mande Anpil ]

Guy S. Antoine afiche mesaj sa, jou 18 Jiyè 2002 a 11:05:48:

Tankou kidnapin Jacky Cantav la, atak yo fè sou Sylvie, madanm Jean-Claude Bajeux a, choke anpil. Sitiyasyon Dwa Lòm lan toujou kontinye deteryore an Ayiti nan anviwonman politik malsen ki egziste a. Moun ki pa renmen Aristide ap kouri blame Aristide. Moun ki pa renmen Konvèjans ap kouri blame Konvèjans. Moun ki pa renmen Meriken ap kouri blame CIA. Moun ki pa renmen pèp ap kouri blame pèp. Moun ki pa renmen X Y Z ap kouri blame X Y Z. Men kilès nan pati sa yo ki responsab tout zak malonèt sa yo oumenm yon pati nan zak kriminèl yo? Eske tout tonbe sou do yon endividi ou yon sèl pati osnon bagay sa byen depataje nan yon konbit malpwoprete?

Sa pa evidan paske anpil move krab pwofite sou zafè enstabilite politik peyi a ak move imaj Ayiti prezante sou sèn entènasyonal la: Anpil krab ki pa rekile devan anyen pou fè enterè pèsonèl yo pase anvan. Nan tout bagay sa yo se yon sèl bagay ki toujou manke, se pa teyori yo, se toujou evidans lan.

Apa jete gouvènman an, ki toujou parèt tankou solisyon pou tout pwoblèm Ayiti janm genyen, ki sa Ayiti gen pou l fè pou ranfòse KAPASITE envèstigasyon fòs polis li e asire endepandans politik li tou pou yon jou nou soti anba lankètsepousui sanpitènèl nou fin abitye avèk li a. Retire Aristide, mete li sou kote, METE NENPÒT KI NÈG NOU TA VLE WÈ NAN PLAS LI, men kesyon an toujou rete menm: ki sa jenerasyon fiti yo kab fè (mwen pèdi tout espwa sou jenerasyon aktyèl la) pou asire ke nan lan 2054 nou pa sevi anba menm sistèm jidisyè lankètsepousui a?

Mezanmi, si nou reponn, pote yon ti imajinasyon nan repons nou yo, olye se menm rayisman nan kè nou ki toujou manifeste sou fowòm lan anvè entèl ou entèl? Menm si ou jije se ou sèl ki sensè sou fowòm lan, menm si ou jije se ou sèl ki wè klè, menm si ou jije tout moun ki pa pataje menm opinyon politik avèk ou se enbesil yo ye oswa patizan pouvwa yo ye, sa pa diminye responsabilite ou pou eklere lòt suivan rezònman pa w ak entelijan pa w. Jouman ak rayisman yon ayisyen pou yon lòt pap janm ede nou vanse yon may. Byen ke sa pa evidan, mwen vle kwè nou tout gen omwens yon ti eleman ki pozitif lakay nou. Pran swen pou se eleman pozitif sa nou pote sou tab la.

Nou pa bezwen youn renmen lòt (SA PAP JANM RIVE!!!) pou nou konprann nesesite pou nou travay ansanm pou enterè pitit nou ak pitit pitit nou. Nan Etazini, demokrat ak repibliken (repiblokrat ak demobliken) konprann sa trè byen.

Repons sou sijè sa: