Lame Kanibal delivre Kiben nan Gonayiv, LAPOLIS AN DEWOUT

[ Kesyon Moun Mande Anpil ]

An repons a: Lame Kanibal delivre Kiben nan Gonayiv, LAPOLIS AN DEWOUT Lwijan Boje te ekri a,

Guy S. Antoine afiche mesaj sa, jou 05 Out 2002 a 03:47:19:

Monchè Lwijan Boje,

Ou byen vini sou Fowòm Ayisyen an. Rale chèz ou chita pou kontinye analiz politik sa avèk nou. Ou di ANPIL pawòl konsekan nan paragraf sa yo ou sot ekri la, ki ban nou reflechi anpil sou lavni peyi a!!

Men sa ou di yo tèlman pwofon, li ta bon pou w ajoute plis sou yo pou tout moun konprann pawòl yo klè. Te mwen souliye de twa ladan yo, anvan mwen mande w yon kesyon kapital sou sa ou di yo:

"yon mouvman revolisyonè se nan aksyon e sitou ak òganizasyon-l li ka montre sa"

"Ki òganizasyon popilè serye nèg-yo mete sou pye nan peyi-a? Apa yon dal moun yo manipile kap rele "Viv Titid".

"Frantz Fanon di koze sa-a : "politiser les masses, c'est créer l'esprit, c'est mettre au monde l'esprit". Se nan òganizasyon popilè kote pèp chita yap reflechi, yap kritike se la sous chanjman soti (anndan alfa, anndan komite katye)."

"pa gen òganizasyon popilè ditou ki pou mobilize nan peyi-a"

Bon, ou dwe tou wè ki kote m ap vini avèk ou:

1)Ban nou yon ti diplis sou kouman yon mouvman popilè gen pou transfòme tèt li an mouvman revolisyonè.

2) Eske transfòmasyon sa KAPAB fèt pasifikman an Ayiti (etandone enterè ki an plas yo)? Kouman fòs fè nwa yo ap reyaji fas a yon mouvman revolisyonè pou devlòpman peyi a? Gen moun sou fowòm lan ki predi yon lòt Ruanda, yon lòt Kabila, yon lòt Chili, elatriye. Dapre oumenm, lan nouvèl òd mondyal la, èske se yon kap ki enkontounab?

3) Nan istwa mouvman Lavalas la, ki pi gwo erè nèg yo te komèt, e ki leson nou kab tire sou erè sa yo pou yo pa refèt alavèg ankò?

4) Ou pale de "alfa", de "komite katye"...

Sa vle di pou mwen ke w kwè tankou mwenmenm ke edikasyon sivik pèp la se yon "sine qua non" pou devlòpman li: sa vle di respè pou yon Eta Dwa, respè pou vi moun, respè pou pwopriyete moun, respè pou diferans ant moun, respè youn pou lòt, demach pou anrichisman kolektif olye de konpòtman sovkipe ki ale nan detriman anviwonman an ou kolektivite a. E finalman kote konsyans kominote a kapab metrize lènmi kab enfiltre li yo: dwòg, zam, ak lòt eleman anti-kiltirèl yo. Fòk se yon edikasyon ki lateral an menm tan li vètikal, pou l kapab pwopaje rapidman de youn a lòt pou efè maksimòm lan.

Men ki sa ki kab fèt pou asire entegrite fòmatè yo, animatè yo? Si mouvman Lavalas la te kite chans lan pase (e mwen pap pale de Pati Lavalas, paske laplipa moun nan Konvèjans lan soti nan mouvman Lavalas la), ki sa mouvman popilè a kapab fè pou l redrese kolòn vètebral li defason pou l kab defini ki wòl li chwazi pou tèt li, nan lòd mondyal peyi G8 yo vle enpoze san espas pou dezagreman?

Andotretèm, nou deja konnen sitiyasyon an malouk. Men odela erè ni pati ki sou pouvwa a ni mouvamn lavalas la, eske ou kapab trase ESKIS YON REYISIT POU PEYI D AYITI?

Mèsi Lwijan. Mwen reponn ou dirèk, men se tout moun m envite patisipe nan brasman lide sa.



Repons sou sijè sa: