Kesyon sou medya ayisyen yo

[ Kesyon Moun Mande Anpil ]

Guy S. Antoine afiche mesaj sa, jou 25 Out 2002 a 19:01:40:

Lò ou ale nan "Voices" sou Windows on Haiti, ou twouve lyen sa: "Haitian Radio Network", kote kanmarad Anselme nan Boston chache fè rasanbleman radyo kominotè ayisyen yo. Se yon bèl travay li fè la, e mwen mete chapo mwen byen ba pou bèl jefò sa. Men adrès la: http://www.anselme.homestead.com/RADIO.html

Travay sa natirèlman pap janm konplè. Li ta bon pou nou ede kanmarad Anselme nan rasanbleman sa l ap fè pou kominote ayisyèn lan, epi voye done pou li ki poko rantre sou sit wèb la.

Gen plizyè lòt konsiderasyon mwen ta renmen soulve nan mesaj sa:

- Si emisyon yo pa aksesib sou entènèt la, li ta bon tou pou nou voye enfòmasyon ki kab pèmèt kapte yo sou ond lokal yo, lò sa posib, sètadi ki frekans AM / FM / SW epi ORÈ emisyon yo. Si li posib pou koute yo sou entènèt la tou, bay "URL" yo.

- Nou kab fè demèm pou emisyon televizyon yo tou. Mwen tande nan zòn Spring Valley, NY la sèlman genyen 52 pwogram ayisyen. Ki moun ki kab bay plis enfòmasyon sou pwogram televizyon yo nan dyaspora a?

- Esplike fenomèn nonm emisyon radyo yo kab diminye seryezman nan dyaspora a pandanstan menm pwogram televizyon yo sanble ap miltipliye.

- Ki sa nou kab di sou estil ou kalite medya ayisyen yo (radyo / jounal / televizyon) nan dyaspora a? Se pa koze politik mwen vle diskite la... sa se domèn yon lòt konvèsasyon. Mwen vle plis konsantre sou prezantasyon machandiz la ke panchan politik yo ki kab mennen nou nan yon diskisyon sa fen. Men kèk bagay mwen ta renmen konnen: a) ki sa ki distenge yo; b) ki lang yo pale; c) ki fòma yo adapte: monològ, dyalòg, mizik, anons kominotè, evènman, elatriye; d) ki demografik yo plis atire; e) ki valè lajan yo rantre oswa yo pèdi; f) konbyen tan biznis lan dire; g) ki depandans kominote a genyen sou medya sa yo; h) ki sipò kominote a bay medya sa yo; anpil lòt bagay ankò mwen pa gen espas pou mwen site la. Kòm nou wè, li posib pou nou diskite medya yo sou aspè non-politik yo epi nou kapab diskite aspè politik yo apa. Pou ki sa? Se pou yon rezon byen senp: Depi nou kòmanse diskite politik an premye, konvèsasyon an pa JANM rive pi lwen, konsi Ayisyen pa gen kilti, se de politik sèlman yo viv.

- Ki gran sililarite ou ki diferans fondamantal ki genyen ant medya ann Ayiti yo ak medya ayisyen nan dyaspora a?

Natirèlman, lò nou pale de medya sa kouvri: radyo, televizyon, jounal, ak entènèt. Mwen sipoze chak nan medya sa yo gen karakteristik pa yo, kidonk si remak nou vle fè yo plis pote sou yon medya pase yon lòt, li ta bon pou nou fè distenksyon an tou.

E gen medya tradisyonèl mwen pa menm touche nan kad disksiyon sa tankou liv ak magazin, paske mwen kwè pwoblematik medya sa yo merite yon trètman separe. Epi gen yon lòt ankò ki sanble kòmanse ap fè anpil bri nan kominote ayisyèn lan an Ayiti epi nan dyaspora a tou: SINEMA AYISYEN sou video ou sou gran ekran. Men sa se yon fenomèn relativman nouvo ki merite diskite apa tou.

Kidonk, mwen lanse yon apèl la pou nou bay dizon nou sou karakteristik, vitalite e potansyèl medya ayisyen yo (radyo, televizyon, jounal, entènèt) epi rete santre sou sijè sa tanpri san chire-pit politik pou fèmen tout dyalòg anvan menm li kòmanse. Mwen konnen gen plizyè kanmarad sou fowòm lan ki gen eksperyans ak medya yo, kidonk m ap tann kontribisyon yo.

Mèsi.


Repons sou sijè sa: