Inisyativ pou soti nan soudevlòpman

[ Kesyon Moun Mande Anpil ]


An repons a: Diskou Premyè Dam Repiblik ka nan Konferans sou Dwa Moun ak Sante HUM! te ekri a,

Guy S. Antoine afiche mesaj sa, jou 08 Septanm 2002 a 15:19:20:

Hum!, mwen konprann pozisyon w trè byen. Sepandan, pa panse se atravè diskou sa mwen te vle defini mouvman devlòpman kominotè yo. Kòm mwen te vizite Kanj e mwen te gen chans pase yon moman ak Paul Farmer, koute l dekri travay li fè nan mitan kominote Kanj lan (ak enfim ki soti byen lwen Kanj tou) ak valè obstak li gen pou l simonte pou fè travay sa kab kontinye toujou pandan peryòd anbago a, mwen te li diskou Premyè Dam lan ak enterè e mwen pa te vle pase li sou silans. Si ou byen li reyaksyon m sou diskou sa, ou va wè mwen pa te soumèt li nan espri voye monte, men se te pou evalye ide ki te prezante nan diskou sa. Mwen fè kritik pa m sou diskou a, ou fè kritik pa w tou, se byen. Sepandan, ankò infwa, mwen ta renmen nou remonte anlè sou premye mesaj nan liy diskisyon sa ki pa te kòmanse ak diskou Premyè Dam lan. Mwen ta renmen tande temwanyaj kèk patisipan sou fowòm lan kab bay sou eksperyans yo ak mouvman devlòpman kominotè sa yo. Ki sa yo te wè ak de grenn je yo? Ki sa yo te patisipe ladan yo? Ki sa nou kab fè pou ede mouvman sa yo pran chè nan peyi a? Ki sa nou kab fè pou nou sipòte devlòpman lokal nan zòn riral yo? elatriye...

Otreman di, yon pyès monnen gen 2 fas. Youn pa ka egziste san lòt la. Nan ka Ayiti, nou bezwen LETA. Yon leta modèn, yon leta pwogresis (suivan liy kanmarad la ap devlope sou fowòm lan), yon leta ki gen fòs sou baz enstitisyon (fondasyon) solid ki pèmèt li fonksyone. Leta sa souvan senbolize pa yon gouvènman ki gen pou misyon pou l asire pèmanans LETA ak byennèt pèp ki anba pwoteksyon li. Sa se fas MACRO a ou fas GLOBAL la. Se sou li nou ekri chak jou Bondye mete. Pou rezoud pwoblèm Ayiti, nou toujou panse pou chanje gouvènman an, e mwen pap pale pou kounyè a non, m ap pale pou depi 1804. Nesesèman, pou yon peyi vanse fòk li gen yon bon lidè. Kidonk li natirèl pou nou toujou ap kesyone kalite lidè politik nou yo. Men se toujou menm fas la n ap diskite, sanble nou ofri anpil rezistans pou nou menm kòmanse diskite lòt fas la.

Lòt fas la, fas MICRO a, fas LOKAL la, se sa mwen ta rele inisyativ natirèl yon pèp. Mwen obsève anpil Ayisyen chita kritike gouvènman tout lasentjounen (kèlkeswa gouvènman ki sou pouvwa a), men yo pa janm enterese PRAN oswa ANKOURAJE okenn inisyativ ki ta kab asire youn (1) ou de (2) ou kat (4) ou dis (10) gason/fanm/timoun twouve yon pi bon lo nan lavi a. Nou abandone fas sa bay sektè relijye a, sektè charitab yo. Se konsa nou twouve plizyè milye misyonè etranje vin okipe espas sa pou nou. Inisyativ pèsonèl pou nou amelyore kominote nou yo vin redui prèska zero. Nou mete gouvènman responsab tout bagay. Gen yon ti gwoup Ayisyen menm ki vin tèlman sinik, yo ta prefere wè tout mouvman devlòpman kominotè yo echwe jis pou yo kab kontinye lonje dwèt sou gouvènman an pi byen. Pito ANYEN pa reyisi nan aryè peyi a, paske sa ta ale alankont agiman yo ke anyen pa ka mache nan peyi a toutotan gouvènman pa chanje.

Koute, mwen pa yon teyorisyen, men ensten mwen di m ke toutotan nou pa devlope inisyativ lakay nou, bòn fwa pou youn ede lòt, vizyon pou nou wè kote nou ta kab rive ak enèji pou nou transfòme sosyete n ap viv ladan l lan, gouvènman Pòtoprens yo se yon ka pèdi. Tout pyès gen de fas. Ayiti bezwen gouvènman ki eklere men li bezwen bra tou ki pare pou yo travay nan bati yon kominote, se pa chak koukouy klere pou je yo. Mwen pa kab dekouraje kritik gouvènman, men si nou byen gade, majorite jenn Ayisyen "give up" deja paske yo pa wè posibilite pou yo ta fè okenn diferans pou peyi yo yon jou. Depi yo leve, se negativite ki antoure yo. Poukisa nou pa pale sou posibilite yo tou? Poukisa nou vle sove yon peyi men nou pa enterese pale de sove yon ti gwoup Ayisyen? Poukisa se sektè relijye a sèl ki kab ipoteke lavni peyi nou? Se bagay sa mwen pa konprann.

Eske li menm POSIB pou nou ta diskite mouvman devlòpman kominotè yo sou Fowòm Ayisyen an?

M espere anpil moun va patisipe nan deba sa, paske anpil moun konnen domèn sa pi byen pase m, men jiskaprezan yo prefere gade silans yo.





Repons sou sijè sa: