Chatiman kòporèl pou elèv lekòl nan peyi a

[ Kesyon Moun Mande Anpil ]

Editè Fowòm lan afiche mesaj sa, jou 26 Septanm 2002 a 01:58:19:

Nou te kòmanse pale deja sou sikonstans kote timoun te konn resevwa kout (tap, men, matinèt, kawoutchou, frèt, rigwaz, kalòt) nan lekòl an Ayiti. Eske gen lekòl nan peyi a kote pwofesè bay kou toujou REGILYÈMAN, avèk pèmisyon ou konsantman paran yo? Si mès sa fini, ki lè li fini egzakteman?

Ki efè sistèm doub pinisyon an te gen sou nou? Paske si yo te pini w lekòl, gen anpil chans ke si paran ou te vin konn sa, lò w rive lakay ou yo tap pini w ankò?

Eske gen relasyon ant vyolans nan edikasyon ak vyolans nan sosyete a?

Eske kale yon timoun lekòl kapab ede li aprann pi byen? Aprann li sispann fè dezòd? Ede li chanje konpòtman li nan yon sans pozitif? Ou le kontrè, kote se bonm a retadman ou kreye kote lò timoun sa gran li pral defoule li sou zòt ou sa ki pi piti (gen mwens pouvwa) pase l?

Eske lò yon paran kale yon timoun lakay li devan fanmiy li sa gen menm efè lò se yon pwofesè ki kale timoun lan lekòl devan kanmarad li?

Kouman yon pwofesè kapab mentni lòd nan klas li si li pa gen dwa bay kou, si limenm li derefize bay kou, epi li fè fas a youn ou de "elèv tirbilan"?

Yon bann ak yon pakèt kesyon pou nou byen santre diskisyon an kounyè a sou zafè chatiman kòporèl NAN LEKÒL YO. Byen ke genyen anpil relasyon ant pinisyon timoun lakay yo ak pinisyon yo (te) resevwa nan lekòl yo, mwen envite nou fè posib nou pou nou diskite 2 dosye sa yo separeman anvan nou fè sentèz la.

Epi si ou gen bon jan konsèy pou aleje fristrasyon paran ak pwofesè yo defason yo kapab twouve altènativ ki miyò pase metòd vyolans yo, pa neglije pataje yo avèk nou.


Repons sou sijè sa: