Yon mesaj pou Widy

[ Kesyon Moun Mande Anpil ]


Guy S. Antoine afiche mesaj sa, jou 24 Oktòb 2002 a 10:21:58:

Widy, mwen eseye kontakte ou an 2 fwa sou imel ou te voye ban mwen an, men mwen pa konnen si ou resevwa mesaj yo. Fè m konnen. Mwen vle pousuiv rapwòchman nou kòmanse a, an prive kòm an piblik. Nou tou 2 gen menm ideyal yo pou Kreyolofoni an, kidonk pa lage.

Fè m siy. Si ou pa twouve mesaj yo, mwen va voye yo ba ou ankò.

Kenbe la, e mèsi anpil pou patisipasyon w sou Fowòm sa. Gras a ou, mwen aprann anpil bagay sou jan yo pale Kreyòl la nan Gwadloup. Gen anpil ti diferans lokal tankou "ni" pa egzanp ki te abitye ban mwen pwoblèm, men kounyè a mwen konsyan fason Matinikè ak Gwadloupeyen toude itilize mo "ni" an. Gen anpil, anpil lòt bagay mwen aprann toujou e mwen te vle rezime yo nan yon dokiman. Jiskaprezan mwen poko twouve tan pou mwen fè sa. Diferans yo pa yon baryè, okontrè mwen pito di "Viv Ladiferans". Men sepandan, se ekriti Kreyòl la mwen ta renmen wè ki vin fè yon sèl, kit ou Ayisyen, kit ou Matinikè, kit ou Gwadloupeyen, kit ou Kiben desandan ayisyen, kit se Kreyòl La Dominik, elatriye. Mwen vle angaje nan mouvman sa pou nòmalize ekriti Kreyòl nan Karayib yo, si se pa atravè lemonn menm. Tout gran joune kòmanse ak yon ti pa. Ti pa ti pa, n ap rive. M espere tout Kreyolis sou Fowòm lan ki aksepte nòm ekriti Kreyòl la an Ayiti (ofisyalize depi 23 an!) ap la djanm sou kote mwen e sou kote w tou ansanm ak tout frè antiyè nou yo. Nou gen yon kilti nou pa kab kite mouri, e Ayisyen gen yon pozisyon lidèchip nan mouvman sa pou yo pa kite efrite. Se pa pou anyen nou pran endepandans nou depi 200 an. Se pa pou anyen desandan nou nan Kiba venere kilti kreyòl yo konsa.

Mèsi pou CD "Gwo Ka" ou ofri m yo e lò ou voye yo, m ap pwofite pase yo bay Serge pou fè revi nan Windows on Haiti.

Gen anpil lòt bagay pou nou di. Kidonk, voye yon mesaj korespondans prive ban mwen pou nou kontinye pale sou tout bagay sa yo.

Kenbe la,
"Mèt a manniòk"




Repons sou sijè sa: