Lèt tou Dekachte yon Pitit Ayiti Voye pou Prezidan Aristide

[ Kesyon Moun Mande Anpil ]

An repons a: Lèt tou Dekachte yon Pitit Ayiti Voye pou Prezidan Aristide Hum! te ekri a,

Siizenn afiche mesaj sa, jou 26 Desanm 2002 a 01:24:26:

Bonswa e Jwaye Nowèl tout vye zannmi yo. Toudabò, kite m salye e remèsye Jafrikayiti pou lèt sila a ke mwen ta trè fyè mete siyati m anba l. Mwen swete ak tout kè m ke Prezidan Aristide ta okouran de majorite pwoblèm ak tout sijesyon / solisyon Jafrikayiti voye bali yo. Mwen pran libète sikile lèt la non sèlman sou entènèt la men mwen distribye kopi l bay tout Ayisyen ak Meriken nan kominote m ap viv la. Anko infwa, mèsi anpil.
PB. Jaf, eske ou panse voye lèt sa a bay Michèle Karshan ki se pòt pawòl laprès gouvènman Ayisyen an ? Se pou w te blayi l sou sit Palè Nasyonal la tou.

Kite kantik ann pran priyè. Alaverite se yon lapriyè Pè savann Kesyon ke Nanmera ak Hum ap soulve yo ekziste paske swadizan opozisyon ke y ap sipòte a kreye pwoblèm sila yo. Mwen pataje dezolasyon Padel lè li reyalize apre tout koze tèt frèt sa yo Nanmera=Hum vin ak yon pakèt koze depaman epi kòm dabitid y ap eseye vire sije a sou yon seri de pwoblèm ki pa kanpe sou anyen.

Ann pran pwoblèm yo youn dèyè lòt. Pou jodi a, n ap pral chache konnen kote Lavalas ak Opozisyon an soti.
Devan menas Roger Lafontant ki ta parèt pli popilè ke ni misye Bazin ni Victor Benoit ak tout Sylvio Claude an pasan pa mèt Gourgues mesye FNCD Front oubyen Federation National Chretien pour la Democratie yo mande Pè Aristide pou l parèt kòm kandida yo. Pou asimile yo ak ti Pè a yo pran non OPL Òganizasyon Pati Lavalas. Anvan yo te jwenn ti Pè a, Mèt Benn [Victor Benoit]te kandida yo, yon nonm ki detanzantan pouse detwa mo kont Duvalier sou antèn radyo Karayib. Li kwè li te popilè nan Pòtoprens e li te konte sou de twa bilten vot sou moun bò mache Salomon ak nan Bapedchoz. Le peti Pè de SenJan Bosko, ki t ap voye monte kont sistèm Duvalier sou lòtèl e ki te gen odyokasèt an sikilasyon non sèlman nan tout pwovens an Ayiti men sitou nan dyaspora a, te asire laviktwa de kèlkeswa pati ki te parèt avè l la. Se konsa FNCD konnen li soti ak yon gwo lo. Nèg tankou Evans Paul pa t gen pwoblèm pou pèp la te nonmen Mè Pòtoprens. Tout 46èm lejislati a esepte pou dezoutwa Senatè tankou Wesner Emmanuel la majorite ladan yo nonmen sou woulib popilarite Pè Aristide. Vwalatilpa nèg tankou Paul Denis, Hubert de Ronceray jounen jodi a pa fouti ale nan okenn "eleksyon yon nonm yon vot". Ann tounen nan sijè a, nou t ap chache kote opozisyon an soti.

Nou pa kab di ke mesye yo te Kòkòt ak Figawo men nou te panse ke tout moun t ap panse ak PEYI. Koudeta foure pye l nan jwèt la. Makout ki pat ladann pou dizan pran woulib pou twazan. Roger Lafontant jwenn lanmò l. Kan makout la pa fè gwo bri ak sa a. Kat la rebat. K-Plim retounen nan meri li. Malval timidman anba chal ap kenbe pou Titid ak Preval. Nan palman an, se la sitou nou jwenn moun ki te touye lanperè. Izmery sakrifye douvan leglis Sakrekè Pòtoprens. Tout moun rekonèt Konze yo. Nèg voye jete kravat Lavalas yo. Detwa kite mayo Lavalas la anba chemiz yo. Si w parèt aklè militè ak makout ap fè w pran rak. Pa band e pa pakèt anbasad meriken ap ponpe manm òganizasyon popilè [patisipan nan mouvman ti legliz ] yo an egzil. Se yomenm menm konsil ,vis konsil ki ofri viza yo, swadizan pou pwoteje ti mesye yo. Pa etone nou byenke antretan yo derefize kite refijye antre pa bato. Se pwogram pou detwi òganizasyon de baz yo ki te koumanse ou ki t ap kontinye. Frè leve kont frè. Popilasyon Plato Santral deklare anti- Lavalas.

Alafendèfen nou pote Aristide tounen apreke nou fin savonnen tèt li pou l rekonèt ke san boujwazi a li pa k ap jwenn kras tab pou l bay ti pèp la manje. Kondisyon pase. Pa manyen mesyedam Koudeta yo. Chanje deviz ou. Grate do m ma grate pa w. Mesye lajan yo fè lavironndede douvan Taba.
Oke ou gen dwa kraze lame men nou pral ede monte yon lòt e nou pral menm dezame ni ansyen makout ni ansyen lame pou ou. Kakarat dèyè bwèt. Gade yon koze misye al pi lwen toujou. Men li fè enpètinans sa l al siyen pak ak Fidel Castro. Doktè kiben nan tout rakwen peyi a. Ann fè yo sonje ke se Ayiti ki te fout vote pou mete peyi Kiba deyò nan OEA ak tout nasyonzini. Ti Pè sa a gen twòp sou li.
Misye bannou kou a, li fè mal, nou fè kom si ryen netè. Nou pouse pyon nou , nou konnen n ap pran l pi devan.
Nou lage Prezidan Aristide toutouni nan lakou Palè Nasyonal. Ou sonje nou te mete nan yon ti vitrin. Nou pat panse ke li t ap dire plis ke yon semèn, yon mwa, en nan. Nou tronpe nou grandman. Men yon dekad pase, nou blije ap sèvi ak menm nèg ki te ajenou nan pye l pou l Prezidan yo an 1990. Nou fe yon ti pwogrè, nou te mete ansanm ak yo, tout ansyen makout ke mesye Fanmi Lavalas yo pa bezwen. Tout ansyen mè ki jounen jodi a nan yon eleksyon yon nonm yon vot pa menm kapak pase kòm reprezantan yon KAZÈK.

Pou ki tout pale anpil sa a. Nou tout konnen se aloumnay FNCD a ak tout ansyen makout ak milite ke Lavalas gen dout sou yo kòm enfiltratè ki konpoze OPOZISYON an.

Pou m fini kisa nou vle espere de SIPÒTÈ OPOZISYON an kant yomenm yo pa chita sou ANYEN ?

Pou jwenn repons la, li mo ki ekri ak lèt majiskil yo nan kesyon an.

Repons sou sijè sa: