Bib la se: Pawòl Bondye osnon Pawòl Moun ?

[ Kesyon Moun Mande Anpil ]

Jafrikayiti afiche mesaj sa, jou 12 Mas 2002 a 09:54:54:

Sou menm ribrik braselide sou orijin relijyon Krisyanis lan...

Kontrèman ak relijyon Krisyanis, plizyè lòt relijyon sou latè (tankou Vodoun) pa genyen ankenn dokiman ekri ke yo prezante kòm pawòl Bondye. Souvan, se yon diferans Kretyen idantifye kòm prèv siperyorite Krisyanis la sou lòt relijyon ki pa gen ekriti "enspire" tankou Bib la. Nan chenn diskisyon sa a annou fè yon ti rale espesyal sou preparasyon epi piblikasyon Bib la kòm dokiman (nou kab manyen) ke Kretyen yo konsidere kòm pawòl Bondye.
Ne koze a, se yon kesyon ki senp: èske se makdwèt moun osnon makdwèt Bondye ki nan Bib la?

Depi lontan moun ap mande tèt yo kilès ki ekri liv sa a yo rele Bib la?
Bib la se yon konpilasyon plizyè dokiman. Li gen de kategori liv ladan li. Yon kategori liv "Ansyen Kontra" ki t ap sikile lontan anvan lèzòm te rekòmanse konte laj yo soulatè, kidonk plizyè santèn ane anvan ane 1 Epòk Kounye a (E.K.) - ant 1200 epi 720 Anvan Epòk Kounye a (A.E.K.); yon dezyèm kategori liv "Nouvo Kontra" ki ekri sòti vè zòn ane 70 rive jouk nan ane 300 E.K. Pa gen anpil gwo diskisyon sou koze sa a nan mitan espesyalis ki etidye Bib la.
Kesyon fondamantal ki kontinye toumante lespri moun se:

A) Kilès ki te ekri liv "Matye" a, liv "Travay" la, liv "Revelasyon" an, liv "Lik" la, liv "Mak" la, chak grenn liv ki non konpilasyon yo rele «Bib la» ?

B) Èske

1) menm jan ak tout lòt liv ki egziste sou planèt la, se moun tankou tout moun ki ekri yo? Osnon,
2) jan Bib la deklare a, gen yon pati (10 Kòmandman yo) se yon Bondye Toupisan ki ekri yo ak pwòp «dwèt» li, epi lèzòm kopye sa mete nan liv epi yon lòt pati se Bondye ki enspire moun pou yo ekri yo nan yon liv ki rele Bib?
Kesyon sa a ta dwe enpòtan pou chak moun ki idantifye tèt yo kòm Kretyen. Paske, selon kwayans Kretyen yo, chak Kretyen dwe suiv sa Bondye di li fè e, kòm tradisyon Kretyen an idantifye Bib la kòm «pawòl Bondye». Kidonk, tout sa ki ekri ladan li, se bagay pou yon ta suiv alalèt. Kidonk, kesyon fondamantal sa a gen yon enpòtans total kapital.

Anvan nou tanmen brase lide a, mwen ta vle kanpe kèk sipozisyon ki lojik daprè mwenmenm. Paske se sou baz sipozisyon sa a, mwen pral devlope agimantasyon pa mwen nan diskisyon an.

Sipozisyon yo:

1) Bondye konnen tout bagay tandiske konesans moun limite
2) Bondye toujou bon tandiske konpòtman moun chanje tout lasent jounen
3) Kontrèman a moun, Bondye pa janm fè erè, li pa janm bay manti

Kidonk, gen 2 estrateji mwen konte itilize pou analize si Bib la se «pawòl Bondye» osnon «pawòl lèzòm». 1) Istorik konpilasyon Bib la 2) Analiz tèks ki nan Bib la pou wè si se makdwèt (karaktè) Bondye lipote oudimwens makdwèt moun.

Ak sekou Bondye, n ap retounen talè konsa.

Annatandan, jwèt pou ou kanmarad...



Repons sou sijè sa: