Yon ti lide pou Fowòm-lan ka pi enteresan

[ Kesyon Moun Mande Anpil ]

Gifrants afiche mesaj sa, jou 18 Janvye 2001 a 21:26:30:

Onè, rèspè frè-m, ak sè-m yo

Mwen panse ke Fowòm pa ta sipoze genyen yon karaktè entelèktyèl sèlman. Mete koze prive, santimantal ak intimite vi pèsonèl yon moun dekote--Tout bagay prive dwe rete prive--, Fowòm-lan ka genyen yon aspè pi sosyal kote Ayiseyn ak lòt moun ki pale e ekri kreyòl te ka bay enpresyon yon de lavi kote yo ye, kòman yo wè tèt yo jan y-ap viv aktyèlman. Sa te ka pèmèt lòt moun ki pa nesesèman vle pale de konèsans livrèsk, di detimo sou sa yo panse, sou pase yo, sou zòn kote yo soti Ayiti, ki ti plezi yo te konn pran, ki konparezon yo ka fè si aktyèlman y-ap viv nan diaspora, sou ki sa yo santi yo manke, ki sa ki ba yo nostalji.

Anfen, mwen kwè ke rann Fowòm pi asèsib pou lòt moun, se pèmèt li soti tou yon randevou de zanmi ki ka pataje eksperyans non sèlman pou moun aprann, men fè yon ti gryendan tou, nan tout seryozite, rèspè e desans ke yon moun sivilize dwe genyen.

Na rankontre pi devan. Adjova.




Repons sou sijè sa: