yon powèm ki rele Dejouke

[ Kesyon Moun Mande Anpil ]

Edner Saint-Amour afiche mesaj sa, jou 03 Fevriye 2001 a 11:29:35:

Dejouke se dabò yon ti liv powèm, yon jan pwezi nou ta rele pwezi sosyal. Pou pwezi sa yo rive gen plis vi, parèt pi vivan, plis cho, otè ya chwazi ekri sou fòm djalòg. Kidonk Dejouke se yon djalòg ant Tikrik avèk Tikrak ki pale anjeneral sou revolisyon an Ayiti, men anpitikilye sou anpe bagay ki mare nou, ki anpeche genyen yon revolisyon ki fèt. Se tout bagay sa yo otè a rele kòd. Dapre limenm, pou Ayisyen rive debake sou rout chimen revolisyon, yo dwe pete tout kòd sa yo ki mare yo, ki anpetre tout lespri konsyans yo. Se konsa Dejouke trete pwoblèm sa a sou plisyè bò fasèt: rapò endividyèl, rapò kolektif, responsabilite pèsonèl, responsabilite sosyal, ekonomi, agrikilti, relijion, lekòl, kòmès, lokipasyon elatriye. Djalòg sa a fini sou yon nòt pisitif ki reklame linyon pou konstri se kle pou mete peyi Dayiti sou ray pwogrè.

Tikrik
Sa fè lontan nap kouri nan savann
tankou yon ti kabrit ki pèdi bann
pèp la genyen bezwen yon bon lidè
ki pou mete l drèt sou ray tren pwogrè.
Sa fè lontan nap kouri nan savann
tankou yon ti kabrit ki pèdi bann
pèp la bezwen fè yon revolisyon
ki pou mete l sou ray evolisyon.
Se fout lè pou mesay liberasyon
sonnen rive bout nan tout zanviron
Kon toro map fout frape pye atè
pou fè tonbe kout loray ak zèklè.
Moun va pran lari nan tout ra kwen
kon michan grenn lapli nan mwa jwen
Jou sa a gwo chabrak andedan palè
va kouri vole gagè devan lafòs popilè

Tikrak
Bon! Tikrik, pou wou mo revolisyon
genyen yon sèl grenn siyifikasyon
fè yon pil moun pran lari pye atè
pou dechouke gwo chabrak nan palè
Gen lè po tchwi dèyè w se yon nat jon
ki pa janm pè kout makak madichon
Monchè po dèyè w se bwa kiyè fè
kanzo ki pa pè manman flanm chalè
Chofe ze w piti piti pou l sa kale
gran chire pa janm fè solèy leve
pwovèb la di chimen lwen gonbo di
men...trò prese pa janm fè jou louvri.

Tikrik
Afè kout makak se pawòl kredi
koulye a se reny lademokrasi
Kote moun gen dwa fè sa yo vle
kote moun gen dwa pale tout koze.

Tikrak
Alò ki vle di nap viv nan tan banbòch
kote moun gen dwa tire menm kout ròch
Monchè wap kouri yon machin san fren
kote l chavire menm zèb pap boujonnen.
Wap machande achte pwosè gwo chabrak
pou yo toupisi kofre w anba kout makak
Dèyè pa m se yon plamen detimiyèt
pa gen kote pou pratike kout chaplèt

Tikrik
Tinèg lach priye nan pye Senmaten
sèlman pou yon plat diri lè maten.
Anbisyon pa m se pa yon plat manje
rèv mwen se pèp la ki pou libere.

Tikrak
Revolisyon pa fèt nan mitan lari
nan banbòch kòlè nan non demokrasi
revolisyon pa fèt nonplis nan palè
kote chabrak ap pran plezi tafyatè.
Si demokrasi te gen bouch pou pale
nan tribinal anpil moun tap jije,
anpil moun tap fèmen nan prizon
pou pwopagann ak difamasyon
paske tròp zen rans betiz komedi
fèt nan non ak sou do demokrasi.
Kanmarad la rale rouzi pise nan mitan lari
pyès lòt moun pa ka di anyen se demokrasi
Tout vye zak laron zenglendo chimè bandi
fèt nan non yon sel bagay ki se demokrasi
Ki fè mo demokrasi ak tout kalite vye zak
manje nan menm plat, kouche nan menm sak
Si se selman konsa nou rive kwè nan demokrasi
nan lanmè diktati pesonn pap ka naje pou soti

Tikrik
Wou pito mouri lach pòv kokobe
tan wou pete esknobrit ak zotobre
Se tande m tande genyen gwo chabrak,
Kon patat map rache yo pak an pak

Tikrak
Si w pa sou dènye planche fetay kay
wou anba trans zany papa Ougou feray
Mo nan bouch wou se pawòl madichon
tankou moun ki gen zonbi ekspedisyon
Pito w kouri vit vit ale wè yon gangan
pou kapab sa jwenn soulajman trètman
Si wou pat soufle avèk move zè
wou pa tap pale pawòl devandèyè.

Tikrik
Zòt yo kap piye kès leta plen pòch
se yo ki pa pale pawòl dwategòch
Pawòl pa m se pawòl zonbi moun fou
kape voye ròch nan mitan kalfou
Soley la klere gro midi byen klè
malgretou wap viv mache nan fè nwè
Gen lè fò yo ta fann je nou ak jilèt
pou nou kapab wè tout sa kape fèt

Tikrak
Mwen pa kwè nan revolisyon bout mamit
vèsè koze kredi chapit eskonbrit,
Limyè bouji limyè lanp tètgridap
pa klere tenèb magouy gwo chabrak
Fè m di w revolisyon fèt nan lespri
kote bèl lide pwogrè ap fleri
Kote kò ak lespri bay lanmen
pou fè pye lavi boujonnen
Kote lide ak aksyon fè yon ganizon
pou fè pwodwi latè pouse tout sezon.
Se lè yon karo tè plante ak bannann
bay tout vant manje plen jouk nan gagann
res rete sere anro nan galita kòlonbye
pou peyizan ale vann nan mache
fè lajan nan res danre rekòl
pou achte inifôm voye ti moun lekòl
ale pran fòmasyon pen lenstriksyon
pou miltipliye pwodiksyon lanasyon
Desanzan apre lendepandans
se lè pou nou sa pran konsyans
revolisyon pa vle di chire pit
madichon deblozay eskonbrit
gwo lobo koudeta anba kout zam
ribanbel retire pye w pou mete pa m
espektak kanaval lari bann reyaksonè
pou dechouke chabrak nan palè
Wi Revolisyon wi revolisyon
se panse bèl lide pou fè bel aksyon
pou miltipliye pwodiksyon lanasyon
pou tout moun kapab gen satisfaksyon
pou tout moun gen mwayen nesesè,
pou satisfè tout bezwen nesesè

Tikrik
Pa fè mwen pran ri kakaye kodase
tankou manman poul ki fin ponn ze
Ki vle di revoslisyon se zèb ginen
sa pouse andeyò nan bitasyon jaden
kote jenn ti toro bèf lage nan pòtrel
ap bwè trenke lèt lapòy nan manmel
Monchè gen lè wou se mango karèm
ki mi jouk lap grennen tonbe anvan tèm

Tikrak
Mwen menm avè w se de rou bremann
ki pa sekle zèb nan menm touf kann
Mwen menm avè w se tankou de bousòl
ki pa fiskire gade nan menm pòl
Menm si nou ta diskite jouk li jou
nou pap janm jwenn nan menm kalfou
Fè konbit manifestasyon rasanble foul
mwen menm map fè konbit gadinay poul
fè konbit dechoukay chabrak nan palè
map vann ze nan mache, bat kòk nan gadyè

Tikrik
Kouman pou vle pou peyi sa chanje
tout moun ap goumen kont move je
zòt menm ap konte ti mamit koze
pou plen djakout pouvwa gwo zototobre.

Tikrak
Wap mache nan dlo fò pye w pa mouye
kouman w vle pou nou ta gen menm pye

Tikrik
Jan m wè wa pale la gen lè w sou pouvwa
gen lè wap souse gwo sosis pa mwa nan leta
Si mwen pa fèmen djòl mwen anba mizo
mwen san lè pran nan yon atrap nigo

Tikrak
Mwen pa kouche sou kabann doub somyè
se yon fason pou de pye m pa pèdi tè
Okontrè se wou kape pale yon fason
tankou yon moun ki nan gwo pozisyon

Tikrik
Nan reny madichon m pa bezwen pozisyon
Sa fè lontan wou konnen m nan lopozisyon.

Tikrak
Genyen lopozizyon pou yon pozisyon
genyen lopozyon pou revolisyon
Nan de vèb sa yo kap konjige
wa di m kilès nan yo wou ye.

Tikrik
Antouka depi se kote ki gen magouy
map fè limyè klere kon dife koukouy
Depi mwen gen souf ki kenbe m an vi
fè genyen demokrasi nan peyi Dayiti

Tikrak
Jan mwen wè wap pale koze grandèt
gen lè rechany vès prézidan w fin fèt
se jou pou prete sèman selman ki rete
pou kouronnen nan palè rwa zotobre

Tikrik
Monchè Tikrak, sispann fè pwezi
pou ekzistans ou sa gen yon vi

Tikrak
Jou wap kouronnen rwa zotobre
Mwen ta renmen pou jou sa a rive
pou mwen ka tande paròl pelas diskou
senkant chapit kap fè dènye moun sou

Tikrik
Wap monte yon montay pa do
wap plede fè fraz franse bel mo
Jou bourik ou bouke sou rout chimen
wa va konnen chak jou gen landemen

Tikrak
Mwen monte sou tèt lamontay byen ro
se pou mwen ale keyi bouske mango
chache tout sa ki bon pou zantray
pou pote pou timoun lakou lakay

Tikrik
Si Desalin tankou w tap pale koze rans
Ayiti pa tap janmen gen lendepandans
Gen nèg ki manje chak jou Bondye mete
Se pou vant yo tann lajè yon manman laye

Tikrak
Se ti nèg banda ki nan lopozisyon
Lespri nan zo bra tèt yo san pozisyon
pou sa konnen ki vès palto pou yo mete
jou yap kouronnen rwa chabrak zotobre
Mwen se yon ti ne gason rotè yon ti chouk
mwen pa gen sik pou sikre rivyè gwayamouk

Tikrik
Pwosè vèbal yo fèt, yo vann nan mache
Yo ap pran plezi lapòy tibèf ki nan tete
Men gen lè nan peyi sa a bann zonbi gaye
nan tout ra kwen katpwenkadino de je pete

Tikrak
Si je w pat fout pete ou ta chèche konnen
vrè bezwen w, bezwen reyel ou genyen
Tout do kay ou koule ou pa menm ka dòmi
tank ou mouye tankou poul frize anba lapli
Men tout tan se yon sèl kesyon revolisyon
kap vire labyel lespri w tankou toubouyon.
Selman lè yo mete bounda w sou recho
wa va fout konnenn si chabon dife te cho
M di w dèyè m pa pitimi ni ranyon koton
pa genyen kote pou fè ekzèsis kout baton

Tikrik
Manman siklôn van tanpèt lavalas lapli
fè anpil moun tounen kannannan zombi
nanm lespri konsyans yo tèlman mafreze
plat manje pou vant yo selman yo panse

Tikrak
Monchè, djòl tout moun fann antravè
se pou yo manje, se pou yo fout bwè.
Map fout manje menm grenn tchatcha
vant plen ra planche jouk m aboutcha

Tikrik
Koulye a manje ak bwè se yon relijion
la va ba wou papa bondye san konfesyon
Men jan mwen wè wap rele fout di betiz
mwen pa menm kwè ou te batize legliz.

Tikrak
Se pou fè dis jou san manje san bwè
Konsa ou va ale jwenn baron simityè
Bon, ki pwoblèm ou genyen ak manje
chak fwa yo pale de sa ou vle endispoze

Tikrik
Ki ta dwa m pou m ta pale kont manje
Pran plezi manje w tout boulin nèt al kole
Bouch ou se pou wou ou fè sa ou vle
manje vant deboutonnen plen ra planche

Tikrak
Men kisa ou vle pou mwen di w plis pase sa
ba w chenn mennen w nan chimelan batwa?
Fè m di w pwojè konbit dechoukay chabrak
se pwojè ale nan mache achte kout makak

Tikrik
Vant plen pa dwe nonplis rann moun sou
pou bliye lòt kwen kote lavi klere kon lejou
dòmi nan sitiyasyon malouk kap toupizi nou

Tikrak
Vant grangou fè n rive kwè nan tout konsey
kap enstale nou kadab etènel nan sèkey
Kwè nan zòt se pay nan van kap voltije
Sonje kabrit di sa ki nan gòj se li ki konte

Tikrik
Si se zafè pèsonel chak moun dwe okipe
Ayiti fouti pap janmen janmen devlope

Tikrak
Fè ganizon rejiman foul mache dechouke
pa bay Peyi jarèt vanse vè lapwosperite
Reny jodi a se pa tan koupe tèt boule kay
Koulye a violans pa bay, se konesans ki bay
Lè nou gen teknik pou fè plant boujonnen
miltipliye nan kat kwen bitasyon jaden
barik mayi sôti nan chif douz rive chif trèz
zannanna kon pengwen pit kon maron ap viv alèz
Nap gen res danre pou nou fè manman depo
nap gen lajan pou n peye Leta taks ak enpo
Lanjan pou Leta ban n sekirite pwoteksyon
pou Leta peye travayè, konstri rout, fè pon.
Nap genyen mwayen pou pran responsabilite
Konsa peyi nou piti piti va mache pwogrese
Konsa Ayiti va kite move rout lanfè diktati
pou debake nan kalfou estasyon lademokrasi

Tikrik
Monchè, Tikrak, fè m rele di gwo ayibobo
se konnye a m tande wap pale mo nouvo
Wou pale koze ki vo san senkant mil pyas
men se konnen byen si pou nou sove lafas
Ayisyen alaronnbadè ap mete men nan pat
pou farin revolisyon sa byen fen kapab bat

Tikrak
Genyen yon bagay tout moun ta sipoze vle
se chache posede genyen anpil bon kapasite
pou pran zafè materyel lavi yo nan men
pou yo mennen desten yo nan bon chimen
Si chak grenn Ayisyen chache genyen lafòs
san li pa pran pòz grandèt sel mèt gran bòs
Ayiti va tounen bel fanm banda yon peyi fò
denpi yonn pa rayi lòt, yonn pap fè lòt ditò

Tikrik
Nan vèsè chapit sa a se rele gwo ayibobo
Denpi kou pa koupe tèt espere mete chapo
Lanp gridap pa di verite men li bay chimen
pou nou mache sou rout kote lavi boujonnen.

Tikrak
Mwen pa ka di w pou rete viv nan laperèz
ni konseye w ale jete kò w andedan falèz
Paske revolisyon se pye bannann miske
ki pouse sèlman nan tè ki genyen fimye

Tikrik
Konsèy se pa grenn bak lanjan fèy dola
men li mennen w nan trou ki genyen ja
Tèt kole men ale men vini fè zanmi dire
Chanje lide se lapli ki fè pye mayi pouse
Lè fini tou fratènite se deviz peyi Dayiti
li pa dwe ekri nan drapo n pou granmesi

Tikrak
Sou pwen sa a yo fè nou anpil gwo kritik
Men anpil bagay mare n kon krab nan barik
gwo kòd mare nou mil ne sere ak gwo teknik
fè n kanpe rèd kon mak dis rou sou fren brik

Tikrik
Mare anba kòd, men nou pa prizonye
ki jan de kòd, kòd pit ou kòd latanye?

Tikrak
Kòd sa yo se tankou espri envizib ki gaye
wou pap janmen ka wè yo ak de grenn je

Tikrik
Ki vle di fè yon moun sa genyen bon linèt
pou wè kòd ki mare n nan pye jouk nan tèt
Monchè fè w ta ban m menm yonn nan yo
konsa mwen ta fè l sonnen rive lòt bò panno

Tikrak
Nan chapit reyalite moun, gen bon kwayans
ki bay ekzistans lavi yon direksyon bon sans
Men se konsa tou gen anpil move kwayans
ki fè vi moun tounen yon kokennchenn rans
Gen moun ki kwè nan yon move tan fiti
yon fiti zonbi ki pap janmen rive vini
Moun sa yo rive kwè nan yon jou na bon
rete chita tann yon ti espwa bann ronron
Gen lòt moun ki kwè nan move pase
ki fè yo rete kanpe sou yon bit reziye
Moun sa yo di se konsa sa te toujou ye
denpi lè djab te solda lame sèjan fouye
Sak pirèd yo rive kwè denpi nan ginen
nèg rayi nèg, nèg ap viv chen manje chen
Gen lòt ankò ki kwè nan yon jodi maske
nan: tout sa ou wè ki fèt se bondye ki vle
Konsa larezon katkwotchou anlè chavire:
se lage tout bagay nan men bondye
Moun sa yo se tankou yon ti machin robo
ki mache anba kout volan papa bondye anro
Letènel se met riches met mizè povrete
se Bondye letènel ki bay se li ki pran retire
Kòm yon machin robo pa genyen volonte
moun sa yo pa gen pyes sans responsabilite
Poutan moun sa yo plen chaje ak kapasite
ki rete mafreze, kap dòmi kap gaspiye.
Yo pa deploye fòs yo pou reponn bezwen yo
men pou fè sèlman volonte papa bondye anro.
Bon tan move tan se papa bondye
vant plen grangou se papa bondye
masay kout makak se papa bondye
injistis kon jistis se papa bondye

Tikrik
Ki vle di papa bondye mele nan tout sòs
se yon solda lame ki desèvis nan tout pòs
Eske nou tande koze mezanmi mezanmi
Bagay sa yo, mesye, si se pa laraj se lafoli

Tikrak
Pou moun sa yo soti nan trou, mache devan
yo merite pran yon bon medsin bòk lavman
ki pou touye nan lespri yo tout vye mikròb
ki anpeche yo aji yon fason pou fè senkòb

Tikrik
Monchè, fè w gen yon volin katafal pasyans
pou yo rive gen yon ti moso miyet konsyans
kap fè yo pran renn lavi yo nan de plat men
kap mennen yo nan yon meyè rout chimen

Tikrak
Kòm yo se yon pakèt moun san konsyans
ki kwè anyen nan lavi yo pa gen enpòtans
Yo bliye tout bagay, larichès kon lamizè
Tout moun ap pase nou tout se pousyè tè
Rich kon pòv, sòt kon lespri kout kon ro
depi jou a rive, tout moun prale nan kavo

Tikrik
Enben, lavi yo se van ki pran tout direksyon
menmsi yo kanpe rèd sou menm pozisyon
pase kout grenn chaplè yon jou nan bon
rete chita gade tann san fè pyès aksyon

Tikrak
Mwen pa di moun pa dwe genyen lafwa
temwen jeyova kwè nan jezi mouri sou kwa
pwovèb pawol la di lafwa deplase montay
men lafwa konn deplase lespri fè l pèdi ray

Tikrik
Pawol sa yo kapab fè yon gason double
yo dwe sonnen pou tout zòrey ka tande
pou koupe jete tout kòd nan mitan kalfou.
Men, pa genyen lòt kòd ankò ki mare nou?

Tikrak
Genyen anpil zôt moun ki kwè nan laparans
Konsa vi yo gen yon sel sans ki se depans
Yo pran plezi achte yon volin rejiman bagay
san bezwen nesesite yon veritab gagòt gogay
selman pou fè zòt rive wè yo genyen lajan
pou zòt ka rive kwè yo se gwo moun ran

Tikrik
Ki vle di moun sa yo kanpe sou bit lajan
pou yo fè gogay gagòt gaspiyay deran

Tikrak
Moun sòt kap pran pòz yo se gwo moun ran
fè depans plen pòch rich ki deja plen lajan
Nan lavi sa a pou yon moun sa viv byen
nan depans fè wou konn fè anpil jeretyen
Yo si tèlman renmen depanse grennbak
chak jou bondye mete yo pran fè bak
Yo poko reyalize ke moun kanpe nan ran
se lè li konnen kouman yo miltipliye lajan
Moun ki tèlman renmen fè depans gogay
yo jire sèmante pou yo viv nan pati bay
Yo refize fè ekonomi miltipliye lajan
yon fason pou yo sa viv nan pati pran

Tikrik
Nan lavi si yon moun pa konn fè resèv
lannwit lè lap dòmi lap fè move rèv
Monchè chapit kòd pa konn fè ekonomi
ka fè yon nonm dòmi nan lari anba galeri
Mete kòd yo deyò plen djakout mwen
se koze pou m ale simen nan tout kwen

Tikrak
Gen zòt moun ki kwè sekrè renn lavi
rete chita nan pwen sipèstisyon maji
Chita gaspiye lajan nan fè vye makakri
touye bèt fè manje jete nan mitan lari
Kwè nan laparans verite kaka poul se ze
simen jete dlo atè kapab fè lapli tonbe
manje piman fè timoun renmen fache
Kout bwa bale fè timoun kata mafrese

Tikrik
Fè n karyonnnen mesay la nan tout bitasyon
paske Ayiti merite gen yon bèl revolisyon

Tikrak
Toutan lespri nou mare senkant ne byen sere
solèy revolisyon pap ka janmen rive klere
Premye chanjman revolisyon ki merite fèt
se koupe tout kòd ki mare nou tout nan tèt
Yon pakèt kòd ki rann nou esklav depandan
menm vant nou mare nan men arivisgrandan
Ki fè toutan nap viv nan prizon mèsi bokou
pou yon ti kal lòsyè charite pote nou sekou

Tikrik
Mande lacharite fè moun tounen tchoul
Tankou tichen ki mare anba jouk poul
Zafè mande charite a se pou bagay sa fini
pou zòrèy pa janm tande pale de sa an Ayiti.
Krab mache chache manje nan krabinay fatra
fè jefò se pou li manje yon fason pou l sa gra
Peche ti pwason nan tout ma rigòl
miyò pase mande senkôb nan bòl

Tikrak
Ayiti bezwen genyen bon jan moun debouya
nan yon bat je ki ka moute pye mango yaya
Ayiti bezwen bon jan moun gwo sèvo lespri
ki konn sekrè lagrikilti pou fè pouse pye diri

Tikrik
Bon gason kanson, konn touse pye pantalon
pou plante pye diri nan bon bastrak lagon
pye diri bay anpil mamit anpil barik
tout timoun manje joukotan yo ayik

Tikrak
Machin kouri sou boulva janjak Desalin
se paske tank li genyen esans gazolin

Tikrik
Si lanp limen se pou li klere chimen
Map pote bonnouvel la nan tout kwen

Tikrak
Tw prese pou janbe pòtay lantiray baryè
konn fè moun frape pye nan bout ròch pyè
Mwen di w revolisyon se bannann miske
sa pouse selman nan tè ki genyen fimye

Tikrik
Ki vle di moun ki mare anba kòd sere
pap janmen genyen zòrey pou tande?

Tikrak
Mwen pap janmen di w pa tante chans
men konnen byen moun san konsyans
se yon pakèt bann foul diaspora ekzile
ki pa janm vle chita sou pyès reyalite
Sak pi rèd lè kòd ekzil kontre ak grangou
se machin san fren, aksidan nan tout kalfou

Tikrik
Monchè, ou antre ekzil nan koze konsyans
sa se pou kapab pase moun serye anba rans

Tikrak
Lè lespri yon moun ap flote nan limajinè
tankou ti zwazo kap vole paroze nan lèzè
pèdi nan chache konnen konbyen zany rebèl
ki pap jwenn lagras pou eritye rwayòm syèl
bliye si gen pye mayi nan jaden pou sekle
bliye si genyen vant ti moun ki pou manje
si bagay sa yo pa rele kòd ekzil dispèsyon
se pou ban mwen yon lt pi bon definisyon.
Moun sa yo toujou ap viv sou bit manti
paske yo pa janm di ak panse sa yo santi
Se lè yon ti flannè tonbe file yon tifi
pou wè pwofondè rimolin lavalas manti
rakonte tout istwa vwayaj zèl malfini
Bagay ki pa gen anyen ak sa li santi

Tikrik
Bon, si mwen konprann byen ekzil vle di:
panse lòt bagay ki pa genyen timoso lavi
Se moun kote tout sèvo yo, lespri tout tèt
badijonnen nan bagay ki pap janm rive fèt

Tikrak
Monchè, kreyol pale kreyol konprann
men mwen pa voye w pèdi nan savann
Pran kont tan w aprann peche pwason
pou zòt pa ba wou krikèt pou pwason
Zen pechè miyò pase kwi pòv mandian
menmsi ale peche nan rivyè pran plis tan

Tikrik
Monchè gen yon pwovèb kreyol ki di:
avek lapasyans na rive wè trip foumi
Travay di bay zanpoud fè mal nan ponyèt
men li bay lajan tou pou achte pantalèt

Tikrak
Lalin pap janmen chanje katye vini nouvèl
toutan nou rete kwè nan istwa tonton nwèl
owi si mwen manti mwen manti apre entèl
vye pawol koze pantalon ranyon san bretèl
koze kredi pou pale devan milet nan pòtrèl
ak sèpan koulèb sere anba zèb manmichèl

Tikrik
Men kisa pou n fè pou moun yo ki pèdi ray
tankou pay kap pran roulib nan van loray?
Eske moun sa yo pa dwe chita sou ban lekòl
pou yo sa dejouke lespri yo ki mare kon kòl

Tikrak
Anhan! pou wou moun yo ki mare kon pikèt
se selman moun ki pa konn li, ki analfabèt
Gen anpil moun ki pase menm bakaloreya
konsyans lespri yo mafreze kon ti moun kata
Moun ki pa konn jeyaga nan fèy malanga
pa toujou vle di, moun san konsyans pou sa
Si sesa ou met pare djòl djakout ou pou sezi


Repons sou sijè sa: