Aktivite NY Jodi a + "Mèsi, Papa Desalin", Moriso Lewa

[ KESYON MOUN MANDE ANPIL ]

Dahoud Andre afiche mesaj sa, jou 17 Oktòb 1999 a 07:32:41:

17 Oktòb 1806-17 Oktòb 1999: Mèsi Papa Desalin!

Konbit Vijilans ap fè tout moun sonje ke jodi a, Dimanch 17 Oktòb 1999, n ap frape yon kokenn koudjay pou komemore anivèsè lanmò fondatè peyi nou, Lanperè Jan Jak Desalin. Aktivite yo ap fèt nan lokal legliz Sen Fransis ki nan kwen Nostrand Ave. ak Lincoln Rd. nan Brooklyn, NY soti 3PM jouk rive 8PM.

Tout aktivite yo ak manje yo ap gratis. Nou swete tout Ayisyen kapab pran yon ti tan pou vin rann Papa Desalin omaj li merite epi pa bliye drapo nou ak timoun yo. N ap sere ti kado patriyotik pou yo.

Pou plis enfòmasyon (wout pou rive nan aktivite a), rele nou nan:
718-672-6060 oswa 718-835-2695.

Mèsi Desalin
Omaj Felix Morisseau-Leroy pou Jan Jak Desalin

Mèsi, Desalin
Papa Desalin, mèsi
Chak fwa m santi sa m ye
M di mèsi, Desalin
Chak fwa m tande yon nèg koloni
Nèg ki poko lib pale
M di: Desalin, mèsi
Se mwen k konnen sa ou ye pou mwen
Mèsi, papa Desalin
Si m yon nonm
Se pou m di: mèsi, Desalin
Si m ouvè je m gade
Se gras a ou, Desalin
Si m leve tèt mwen pou m mache
Se gras a ou, Desalin
Chak fwa m gade lòt nèg
M di: mèsi Desalin
Lè m wè sa k ap pase lòt kote
M di: mèsi Desalin
Lè m tande blan yo pale
M di: papa Desalin, mèsi
Lè m tande kèk nèg parèy mwen pale
M di: mèsi, papa Desalin
Se mwen k konnen sa ou ye pou mwen
Towo Desalin
Desalin, san mwen
Desalin, de grenn je m
Desalin, zantray mwen
Se mwen k konnen
Se pou tout nèg di:
Mèsi, Desalin
Se ou k montre nou chimen nou
Mèsi, Desalin
Se ou k limyè nou
Desalin
Se ou k bann tè n ap pile a
Syèl ki sou tèt nou an
Pyebwa, larivyè
Lanmè, letan, se ou
Desalin, se ou k ban n solèy
Ki ban n lalin
Ou ki ban n frè n, sè n
Manman, papa n, pitit nou
Se ou ki fè n yon jan, yon mannyè
Nou pa kou tout nèg
Si m gade tout moun nan je
Se ou k ap gade yo, Desalin
Se ou ki ban n dlo pou n bwè
Ou ki ban n manje pou n manje
Mèsi, papa Desalin.
Epi, se ou ki ban n kay pou n rete
Ou ki ban n kote pou n fè jaden
Se ou k montre n chante
Ou k montre n di: non
Yo di gen nèg ki di: wi, wi,
Gen nèg ki di: yèssè,
Ou montre n di: non
Desalin: montre tout nèg
Tout nèg sou latè di: non
Mèsi, papa Desalin
Gen nèg ki vle esplike:
³Tan jodi pa tan pase
E ke wi alèkile
La fraternite humaine
L¹humanité, la civilisation²
Tou sa se franse
Mwen menm, se Desalin m konnen
M di: mèsi papa m
Se ou k fè m
Manman m se pitit ou
Ti gason m, ti fi m, se pitit ou tou
Mèsi, Desalin
Pitit pitit mwen, se pitit ou
Wa Desalin, mèsi
M pa bezwen pale pou drapo a!
Pa bezwen pale pou Lakayè
Pou Gonayiv!
Yo di sa deja
E ki moun k ap tande sa ankò?
Mès rekwiyèm 17 Oktòb?
Ki moun ki pral Katedral?
Diskou Minis?
Ki moun k ap koute sa?
Men, sa m di la a
Se yon sèl mo: mèsi
Mèsi Desalin papa m
Gen moun ki pa konnen
Fò m di yo
San ou nou pa ta la a
Mèsi, papa Desalin
Epi, fini ak Patè Nostè ou la a
Monseyè, Desalin pa mouri
Ase pale franse, minis
Desalin pa p janm mouri!
Desalin la
Nèg sa a ta kapab mouri!
Desalin nan kè m
Lamopye
Desalin ap veye
Yon jou, Desalin va leve
Jou sa a, nou tout n a konnen
N a konnen si 1804
N a konnen si Lakayè
N a konnen si Lakrèt-a-Pyèwo
N a konnen si Vètyè
Desalin te fè tou sa
Pou ti nèg ekri pwèm
Pou minis fè diskou
Pou pè chante Te Deoum
Pou Monseyè bay labsout
Desalin pa bezwen labsout
Tou sa Desalin fè bon
Yon jou Desalin va leve
W a tande nan tout lanmè Karayib
Y ape rele kote l
Desalin pran lèzam
Arete l
Lè a, w a tande vwa l kon loray
Tout nèg koupe tèt boule kay
W a tande nan tout Lamerik
Y ape rele: rete l
Vwa Desalin deja nan radyo
Koupe tèt boule kay
Nan tout Harlem, Desalin ap met lòd
W a tande: bare Desalin
Jouk Dakar
Jouk Johannesburg
W a tande: kote Desalin pase?
Koupe tèt boule kay
Desalin pa bezwen labsout
Pa bezwen padon Bondye
Okontrè: Desalin se bra Bondye
Desalin, se jistis Bondye
Pa bezwen Patè Nostè Monseyè
Ni eskiz nèg la yo vle mande blan yo
Desalin pa bezwen
Pou tout sa l fè, m di : papa Desalin, mèsi
Pou tou sa l pral fè
M di: mèsi, papa Desalin.

Nan liv Dyakout 1, 2, 3, 4
Piblikasyon "Haitiana Publications", 1990

Repons: