An repons a: Aktivite NY Jodi a + "Mèsi, Papa Desalin", Moriso Lewa Dahoud Andre te ekri jou 17 Oktòb 1999 a 07:32:41,
Guy S. Antoine afiche mesaj sa, jou 19 Oktòb 1999 a 21:42:44:
Mwen te ale ak madanm mwen ak tout pitit mwen yo nan komemorasyon sa ki te fèt nan legliz Sen Fransis nan Brooklyn lan. Fò mwen remèsye Dahoud ak Konbit Vijilans lan pou opòtinite sa. Yo te òganize youn bèl reyinyon patryotik, e plizyè moun nan odyans lan te leve di tout lòt moun sa Papa Desalin te reprezante pou yo. Mwen menm mwen te fè sa tou, e sa te fè m plezi pou m te pote temwanyaj pa mwen. Leson 1804 la, se youn leson nou te aprann pa kè, men se youn leson nou pa kò fini reyalize toujou. Travay tankou sa Konbit Vigilans ap mennen an li enpòtan anpil, li fèt pou li gaye tou patou, pou youn jou rèv libète tout pitit soyèt reyalize tout bon. Pa bliye braceros yo, pa bliye restavèk yo.
Konpliman pou tout moun yo ki te òganize fèt la, konpliman pou tout moun yo ki te prepare bon jan manje sa yo pou ba moun manje gratis ti cheri. Kòm mwen a la dyèt, mwen pat manje twòp bagay, men bòl soup joumou mwen te bwè sou tèt Papa Desalin lan, li te bon tout bon.
Mwen tou profite tou okazyon sa pou mwen te ranfòse anvè pitit mwen tout koze mwen te konnen ba yo deja sou istwa Dayiti. Mwen pale yo de kèk dat ki enpòtan e sa yo reprezante pou pèp Ayisyen, tèl ke 14 ak 22 Dawou, 18 Novanm, 7 Avril, 18 Me, 1 Janvye. Mwen pale yo de Tousen, de Desalin, de Capois La Mò... Mwen rakonte yo eksplwa militè Tousen Louvèti, mwen pale yo de sa ki te pase nan michan batay Vètyè a. Kòm mwen pap janm bliye, map fè devwa mwen pou timoun mwen yo konnen istwa zansèt yo tou, pou lòt moun pa janm kapab vin pase yo nan betiz. Enfòmasyon se pouvwa, men nan ka sa, se dinyite nou tou.Antouka, pou tout moun ki te anchay, mèsi pou bèl aktivitite 17 Oktòb 1999 sa.