Gifrants afiche mesaj sa, jou 02 Mas 2001 a 23:59:31:
Mezanmi,Sityasyon Ayiti a pa mande pou moun vijilan oubyen veyatif, oubyen vèkse, oubyen fristre, oubyen desi, oubyen enève. Sityasyon Ayiti a senpleman mande pou yon moun kenbe konviksyon li, detèminasyon li, kouray li, èskanp konbatan li pou regle sa ki fèt pou regle pou zafè peyi Dayiti mache pibyen.
Sa ki vle sipòte toujou, se dwa yo. Men na sonje, Lavalas se pase li pase, li pa chita kalm ni tankou dlo sous, ni tankou dlo rivyè, fè li kannale pase ale pou e lanati e lèzòm repran sanfwa yo pou yo kontinye viv. Se yon kalmi ki pote anpil soufrans, lapenn, dezèspwa, e desèpsyon tou.
Tèt sèvitè Ginen lave avèk oubyen dlo pi, oubyen dlo dous, oubyen dlo lanmè, men janmen avèk dlo lavlas. Nou konn pou ki sa? Dlo lavalas ranmase tout salte sou pasaj li, se pa yon dlo ki janm pwòp. Di bouch granmoun santi, men rèspèkte pawòl li. Kòm mwen te di deja, depi sou non an, genyen gwo pwoblèm. Yon kretyen vivan se yon ti Bondje, sa li konsevwa avèk lèspri li, transpire nan aksyon li. Mwen te toujou klè ak tèt mwen—Ayiti bezwen yon revolisyon, pa konpwomi dwategòch pou patche gwo kansè sa ki ekgziste nan mitan sosyete Ayisyen an.
Sipòtè desi, fè tèt-w rezon pou-w yon konbatan danble. Aprann sa byen, avni peyi Dayiti se nan men-w li ye, pouki-w lage li jefèmen nan men zòt? Se rèsponsabilite-w, e rèsponsabilite-w sèl pou-w defann libète-w. Pèsonn pap pran rèsponsabilite sa pou-w. Pa kwè pèsonn ki di yo ka pran rèsponsabilite pou-w. Dayè si gen nenpòt tchouboum, se-w yo rele pou-w leve kanpe. Kidonk, libète-w se nan men-w li. Se rèsponsabilite-w li ye. Pwoteje libète-w, defann libète-w ak kouray-w e ak san-w.
- Anonse Dosou Gifrants 06/3/2001