Emmanuel Vedrine afiche mesaj sa, jou 07 Mas 2001 a 23:39:29:
Poukisa lis REKA pa ka otomatize?
Se meyè fason nou kapab rive jere tout kominikasyon ki pase sou lis la pou jwenn tras yo, pase gen moun ki jis lage yo nan fatra (san konn enpòtans yo pou rechèch alavni), ki enprime yo oubyen konsève yo (swa nan "disdi", sou "diskèt" oubyen sou "zipdis").Pwovèb la di: "la parole va, l'écriture reste" men si REKA pa aplike ti konsèy sa yo pou l ta jete yon koudèy sou lis kouwè "CreoList", "OneList", "Potomitan"… ògazine yo, enben lapawòl pral fè wout li ak tout lekriti.
N ap viv nan yon "monn teknolojik" (byenke n soti nan yon peyi move gouvèlman soudevlope) men se nou ki pou touse kanson nou pou n aplike hot teknoloji a, pran avantaj de li e envesti ladan tou pou pitit ak jenerasyon nou. Olye nou jis ap achte jwèt ak vètman byen chè pou pitit nou, ann lage pito yon konpitè nan men yo ak tout tip sòfwè. E nan jwèt konsa sou konpitè a, timoun nan devlope yon pakèt konesans kote l ka fè milyonven (fini l fin "High School").
Dezan de sa, yon kanpayi ofri yon tibway laj disetan $150 mil dola (pa an) pou yon dyòb konpitè (tinonm nan apèn fin "High School") men misye wè pi lwen: Youn nan papa lekòl nan koze teknoloji nan lakou "Massachusetts" lage yon bous(detid) bab e moustach nan menm l pou l vin etidye san l pa depanse senk.
Nou ka jis chita lakay nou kounyeya devan ekran konpitè a epi n ap travay pou konpayi ki ka menm lòtbò dlo. Tout sa se posiblite pou n kreye "endepandans ekonomik" pou tèt nou sa n pa bezwen "esklav yon konpayi" k ap ban nou yon grenn mwa vakans pa ane, kote nou chaje ak estrès alafwa ki ka ban nou arètkè pi devan.
Vakans mwen, se bagay m pa negosye e kounyeya m ap panse ki apò m ka pote nan "rekonstriksyon" Ayiti pandan "gran vakans" (vakans ete). Donk se nou ki dwe aprann kreye "endepandans ekonomik nou" (men fò n envesti dabò pou sa) e nou ka jis kòmanse ak yon grenn konpitè lakay nou e metrize koze tape a tou.
Mwen pa janm panse m ta benefisye de yon kou tape mwen te pran lè m te nan segondè. Nan inivèsite, se youn nan travay ki te ban m kòb sou kote (majorite elèv inivèsite mwen te a pa t ka tape oubyen yo t ap beke grenn. Donk se priye elèv t ap priye m pou tape papye yo (a $2 paj, bagay ki gen kèk tan). Si ou gen pitit, ti koze sa yo enpòtan: fè yo pran kou tape, kou konpitè, kou ki montre elèv ekri, kou diskou (pou aprann pale nan lasosyete pou timoun nan pa ret bèkèkè lè ou mennen l nan yon seri aktivite sosyal e kiltirèl, apa lòt bagay ki ka enterese l pou karyè l alavni).
E. W. Vedrine
E.W.VEDRINE CREOLE PROJECT, Inc.
http://hometown.aol.com/mit2haiti/Dizan.htm