An repons a: "Gramè Kreyòl DeGraff" Emmanuel Vedrine te ekri a,
Editè Fowòm lan afiche mesaj sa, jou 10 Mas 2001 a 10:34:55:
Mwen vle raple tout moun ki patisipe sou fowòm nan ke Fowòm Ayisyen an, mwen mete li aladispozisyon TOUT AYISYEN KI VLE EKSPRIME TÈT YO AN KREYÒL, nan lang manman yo. Se pa fowòm prive REKA li ye. REKA te kolabore nan lansman fowòm lan, opwendvi patisipasyon manm li yo. Windows on Haiti ap toujou fyè kolabore avèk REKA, paske nou pataje menm objektif yo pou nou pwomouvwa lang Kreyòl la. Fowòm Ayisyen gen de objektif:
1) Demontre Kreyòl la kapab sèvi san pou san kòm lang majoritè, lang ofisyèl, lang nasyonal peyi dAyiti. Ann Ayiti jiskadat, gouvènman itilize Kreyòl la nan yon fason ki limite anpil. Yo fè anpil pwogrè nan di zan ki sot pase yo, menm si anpil nan nou pa ba yo kredi pou sa. Lò mwen ale ann Ayiti, mwen konstate klèman pwogrè yo te fè. Men eske yo fè ase pwogrè? Non!!! Nou la pou nou ankouraje tout Ayisyen wè valè sèl lang ke tout Ayisyen pale. Nan koze sa, objektif nou avèk objektif REKA, se marasa yo ye.
2) Men noumenm nou ale pi lwen pase objektif REKA yo. Nou genyen yon vizyon sosyal tou, e mwen kwè anpil nan manm REKA yo pataje li tou, men sa pa fè pati de "charter" REKA. Vizyon sosyal sa, se vre nou pakò pran tan eksprime li an Kreyòl nèt ale, men ou gen dwa dechifre li nan tout opinyon ke mwen ekri an kreyòl sou fowòm sa, men sitou ann Angle nan tout paj Windows on Haiti. Se yon vizyon sosyal e politik tou, e li pa nesesè pou tout moun ki patisipe sou Fowòm nan pataje menm vizyon avèk mwen. Men mwen pap kache di ou, se nòmal pou mwen itilize fowòm nan pou mwen avanse vizyon sosyal sa a. Sa, mwen pa kwè se zafè REKA. Objektif prensipal mwen, se avanse yon dyalòg nasyonal ant tout Ayisyen, e dyalòg sa gen dwa fèt nan nenpòt ki lang. Li gen dwa fèt an Kreyòl, an Franse, an Angle, an Panyòl, etc, etc. Mwen pa ba Kreyòl la pi gwo priyorite nan sans sa. Se lide yo mwen bay priyorite. E mwen chache kowoperasyon tout moun ki renmen Ayiti, se pa Ayisyen sèlman. Se pou sa jodi-a, ou gen dwa wè lang prensipal Windows on Haiti se angle li ye. Mwen pa janm wont eksprime tèt mwen an Kreyòl. Men pou travay m ap fè nan Windows on Haiti depi twa zan, se an Angle mwen te kapab fè li defason ki pi efikas pou mwen twouve efè maksimòm nan. Fowòm Ayisyen an rantre nan kad efò sa tou. Se yon zouti mwen itilize pou mwen vanse kòz Ayiti ak kòz tout Ayisyen. La, ou gen dwa wè klèman ke Fowòm Ayisyen an se pa Fowòm REKA li ye, paske REKA gen objektif ki pi espesifik pase objektif mwen sot prezante yo.
Finalman, dènye pwen mwen ta renmen fè se ke mwen pa chache pran fowòm lan kòm jwèt pa mwen sèlman. Ou gen dwa wè mwen patisipe nan anpil diskisyon, men ou pap wè mwen voye monte, voye monte, voye monte, tankou se mwen ki chèf fowòm lan e se mwenmenm ki pou gen dènye mo nan tout diskisyon sou fowòm lan.
Ou gen dwa wè zòt fè sa, men mwen refize fè li. Se pa paske ou gen dènye mo nan yon fowòm ki vle di ke moun pral respèkte opinyon ou plis pase yon lòt. Lò yon diskisyon mennen jis li pa pwodiktif ankò, mwen retire kòm ladan.
Pou FOWÒM AYISYEN AN,
Guy S. Antoine
Repons sou sijè sa:
- Yon ti nòt Editè Fowòm lan: Jwèt se jwèt, kwoke janm pa ladan Gifrants 11/3/2001