Men yon ti rale sou vèb se

[ Kesyon Moun Mande Anpil ]

Pwofèt Jozèf afiche mesaj sa, jou 11 Mas 2001 a 17:27:15:

Men yon ti rale sou vèb se. Si ta gen lòt ti eklèsisman, voye yo sou fowòm lan pou plis limyè ka jayi.

Vèb Se

Règ 1:
Se disparèt devan adjektif nan fraz prezan.
Ekz.: Kay la bèl. Machin nan pwòp. Moun yo kontan.

Règ 2
Se parèt an te devan adjektif nan fraz pase.
Ekz.: Kay la te bèl. Machin nan te pwòp. Moun yo te kontan

Règ 3:
Se disparèt nan fraz entèwogatif ki kòmanse avèk Kote.
Ekz.: Kote Pòl? Kote moun yo?

Règ 4
Ou pa oblije mete Se nan fraz entèwogatif ki kòmanse avèk Ki.
Ekz.: Ki moun? Se ki moun? Ki madanm? Se ki madanm?

Règ 5:
Se itilize kòm pwonon demonstratif devan non, adjektif, pwonon, advèb pozisyon, lè li plase jeneralman nan tèt fraz la. Ekz.: Se Pòl ki envite m. Se fasil ou di? Se isit m ap travay. Se mwen ki papa ti fi a.

Règ 6:
Se parèt toujou devan non nan fraz deklarasyon.
Ekz.: Mwen se kòmandan. Li se chèf. Nou tout se Ayisyen.

Règ 7
Se tounen ye nan fraz ki kòmanse avèk yon pwonon demonstratif.
Ekz.: Se medsen li ye. Li se medsen.

Règ 8
Se tounen ye nan fraz entèwogatif.
Ekz.: Kote bèf la ye? Kote moun yo ye? Ki moun yo ye?

Règ 9.
Jeneralman, Se parèt yon sèl fwa nan fraz deklarasyon.
Ekz. Mwen se papa ti fi a. Se mwen ki papa ti fi a.

Règ 10
Se chanje pou se te nan fraz pase.

Se Pòl mwen vle. Se te Pòl mwen vle.

© Prophète Joseph, 2001


Repons sou sijè sa: