REKA ekri Prezidan Preval youn dezyem let - 28 oktob 1999

[ KESYON MOUN MANDE ANPIL ]

REKA afiche mesaj sa, jou 28 Oktòb 1999 a 09:20:57:

28 Oktòb 1999

Lèt tou dekachte pou René G. Préval, Prezidan Repiblik Ayiti
Faks (509) 223-0241


Prezidan,

Jou mèkredi 28 jiyè 1999 la, Rezo Entènèt Kreyolis Ayisyen (REKA) te ekri ou ansanm ak Misye
Léon Manus, Prezidan KEP 1999 la, osijè sitiyasyon malandouran lang kreyòl ap sibi anba men
leta Ayisyen. Nou te pote 6 doleyans devan ou, kòm Chèf Leta Ayisyen; pami yo : nesesite pou
leta pibliye dokiman ofisyèl peyi a, tankou « Lwa Elektoral » epi «Le Moniteur », nan lang
kreyòl.

Jiskaprezan, ni oumenm Prezidan René G. Prèval, ni Misye Léon Manus rete kèpòpòz sou demann nou
te fè nan youn lèt endividyèl ki te ale jwenn nou chak apa. Jodi a, 28 oktòb 1999 " Jounen
Entèsyonal Lang Kreyòl", nou ekri ou youn dezyèm fwa pou nou mande ou :

1) Dekiprevyen Lwa Elektoral 1999 la poko janm pibliye nan lang kreyòl?
2) Dekiprevyen ni ou menm, Prezidan nou, ni anplwaye leta ki ap travay sou lobidyans ou,
chwazi meprize demach pitit peyi a ap mennen, pa ekzanp lèt REKA yo, anfavè aplikasyon lalwa
nan sa ki regade itilizasyon lang kreyòl nan peyi nou?

Prezidan Préval, daprè enfòmasyon ki rive jwenn nou, gen youn biwo anndan Ayiti ki swadizan la
pou regle afè devlopman lang ofisyèl yo, èske se vre? Si se vre, èske « Biwo Lang Ofisyèl » sa
a ap fè travay li tout bon, oubyen li se youn bwat sekrè vid ki la pou fè bèbèl?

Prezidan, se vre pwoblèm defisyans jeneralize nan domèn alfabetizasyon an kontinye ap peze lou
sou do nou kòm pèp ki ap bouske lavimiyò pou jodi a epi pou jenerasyon ki ap vini yo. Men, jodi
a kou ayè, nou chak grenn Ayisyen, nou gen zòrèy pou nou tande epi nou gen bon jan kontwòl sou
kle konprann nou. Sa vle di, lè leta pibliye youn dokiman nan lang nou (kreyòl), menmsi tout
mounn alawonnbadè pa kapab rive li sa ki ekri, sila yo ki gen chans li lafèy kapab ede
(palentèmedyè : radyodyòl, radyo-teledifizyon elatriye…) sila yo ki poko konn li. Konsa, tout
Ayisyen gen opòtinite pou yo tande epi konprann sa ki ap fèt nan peyi yo. Li klè, se sèl lang
kreyòl ki ka pèmèt nou fè sa!

Prezidan, nou sèten ou reyalize lè youn gwoup tankou REKA mande leta Ayisyen pou li fè dosye
lang kreyòl la vanse, se pa favè li ap mande ni pou tèt li, ni pou pèp Ayisyen. Okontrè, REKA
raple leta Ayisyen devwa-l pou li mete-l opa devan lalwa. Nan sans sa a, li pa nòmal pou ou
derefize leve ti dwèt ou pou fè leta Ayisyen respekte lalwa kòmsadwa nan domèn lang ofisyèl la
(Atik 5, Konstitisyon 1987). Non! Nou pa kapab aksepte pou Prezidan peyi nou, Chèf leta a,
rete endiferan sou dosye byennèt lang manman nou an, sèl zouti ki simante tout Ayisyen ansanm.

Daprèzavwa, sou tout latè, se Ayiti ki gen plis mounn ki pale kreyòl, li ta natirèl pou Ayiti
alatèt efò ki ap fèt pou lang kreyòl la vanse toupatou sou latè. Vwalatilpa, jodi a (28 oktòb
1999), Ayisyen sètoblije ap revandike devan pwòp prezidan peyi yo pou leta respekte lang pèp
la.

Omwens nou espere, anvan ane 2000 la pwente, leta va reponn rèl anmwey sa a ki sòti nan zantray
manman ki derefize aksepte pou pwòp pitit li koupe lang li voye jete nan raje.

Youn lòt fwa ankò, nou salye ou, Prezidan Préval, ak lonè-respè nan non Moriso Lewa ak Moris
Siksto, defansè wòdpòte lang kreyòl nou an. REKA kontinye ap tann repons ou tankou tè sèk ki ap
tann lapli.

Pou REKA :

Michel-Ange Hyppolite (Kaptenn Koukourouj)
Responsab Relasyon Piblik

Jafrikayiti (Jean E. Saint-Vil)
Jeran


Kopi Marasa (K. M .) Premyeminis Jacques Edouard Alexis
Faks (509) 245-1624
----------------------------------------------------------------------
Rezo Entènèt Kreyolis Ayisyen (REKA)
"Ansanm n'ap feraye pou byennèt lang Kreyòl Ayisyen"

REKA se konbit youn ekip kreyolis k'ap feraye ansanm pou byennèt lang Kreyòl Ayisyen an.
Jiskaprezan, REKA tabli baz li sou entènèt. Li foure bouch nan zafè lengwistik tankou nan zafè
militans anfavè lang Kreyòl. REKA pa tabli pou fè lajan. Li granmounn tèt li (REKA pa sou
lobidyans okenn lòt òganizasyon: relijye, politik, kiltirèl... kèkeseswa). REKA ap chèche epi
alimante tèt ansanm ak lòt antite k'ap feraye nan menm sans ak li.
---------------------------------------------------------------------

Alewè «Òtograf Ofisyèl Lang Kreyòl » epi anpil lòt dokiman enpòtan nan Achiv REKA

Ekri nou nan: rekayisyen@hotmail.com

Repons: