De twa ti koze, de twa ti kesyon

[ Kesyon Moun Mande Anpil ]

An repons a: De twa ti koze, de twa ti kesyon Michel DeGraff te ekri a,

Guy S. Antoine afiche mesaj sa, jou 21 Mas 2001 a 00:36:16:

Mèsi Michel pou eklèsisman ou pote la pou tout kreyolis sou Fowòm Ayisyen an. Mwen toujou gen rezèv sou "ann atandan", "ann avan", "ann ayè", sitou nan ka kote dezyèm pati ekspresyon an pa reyèlman itilize kòm yon grenn mo lib nan lang kreyòl la, tankou "atandan". Mwen pa janm tande yon moun ta di "atandan" pou kont li an kreyòl. Se rezèv mwen sa. Men m ap kite lengwis yo debat kesyon an, jiskaske ekriti ekspresyon sa yo vin ofisyalize. Mwen gen rezèv, men sa pa vle di mwen ni pou ni kont. Se yon rezolisyon m ap chache.

Nan tèks mwen an, ou va jwenn lòt mo ki ban mwen pwoblèm tou, tankou 3 fòm sa yo:

1. mwenmenm
2. mwen menm
3. mwen-menm

Kilès nan yo ki jis?

Finalman, mwen te ekri tou ekspresyon sa "yon prensip byen aplike". Koute, mwen konnen pafètman, yon peyizan Ayisyen pa pral di: "yon prensip byen aplike". Men avèk tout respè ke mwen genyen pou peyizan Ayisyen, mwen panse fòk nou adrese kouman yon moun fèt pou li ekri kreyòl la jan li abitye pale li. Si m ap diskite avèk ou, mwen wè se nòmal pou mwen itilize ekspresyon "byen aplike" sa. E poutan, la sanble nan ka sa genyen yon "lyezon obligatwa" ki ta pou fèt, paske se "byen (n) aplike" nou tande nan zorèy nou. Mwen panse gen kat solisyon. Nou ta ka ekri:

1. "byen aplike" (selon sa mwen santi Vedrine ta va rekòmande nou)

2. "byenn aplike" (e la, mwen gen enpresyon menm DeGraff pa p rekòmande sa, paske "byenn" pa sanble li katolik ditou ditou)

3. "bien appliqué" (nou prezève ekriti ekspresyon sa kòm yon ekspresyon franse, sètadi yon ekpresyon etranje ki fèt pou li rete nan règ lang provnans li an.

4. "byennaplike" (Nou fè l fè yon mo. Sa mwen deja konnen DeGraff prezante agiman lengwistik kont li).

Men kilès nan 4 fòm sa yo ki pi jis pou nou ta adopte? E souple, pa kabre sou kesyon an, paske li merite yon repons tou.

Diskisyon sa yo gen dwa bay ekriti kreyòl la yon bèl elan tout bon. Mwen remèsye tout moun ki patisipe ladann ak bòn fwa.

Nou pa nan voye monte initil ankò, nou pa nan joure, nou pa nan kabre, se zafè k reyòl la n ap regle.

Mèsi.




Repons sou sijè sa: