An repons a: Yon apèl a tout lengwis kreyolis yo Guy S. Antoine te ekri a,
Jafrikayiti afiche mesaj sa, jou 24 Mas 2001 a 08:49:24:
Onè Guy,Divèjans ki genyen nan mitan ekspè yo se yon bagay ki la depi lontan, se vre. Poudayè li natirèl. Sa ekziste nan tout syans. Se vre tou nou aprann anpil sou fowòm nan gras ak patisipasyon ni ekspè ni senp itilizatè lang nou an. Li klè sa se yon bon bagay. Mèzalò, sa pa anpeche dyalòg ant ekspè yo ta ede nou jwenn zouti konkrè tankou gramè Kreyòl pou Kreyolofòn toupatou itilize san kè sote.
Wi leta Ayisyen gen yon wòl pou li jwe nan kreyasyon estrikti ki va apwouve liv k ap itilize nan sistèm edikasyon peyi a, nan kanpay alfabetizasyon elatriye... Men, annatandan leta mete li opa sou dosye sa a, gen anpil konbit ekspè yo ka reyalize pou yo kontinye jouke konvansyon ekriti lang Kreyòl la - «lòt nivo».
Mwen kontan aprann tout bon bèt k ap tonbe la a, e mwen espere kanmarad yo va kontinye pataje lakonesans ak nou sou fowòm nan. Senpman, ladapdap mwen genyen pou Kreyolofòn parèy mwen reyisi jwenn dezoutwa liv gramè KREYÒL AYISYEN ki pase anba loup ekspè nan domèn nan (peer review)se kichòy mwen pa anvi neglije.
Gramè sa yo ap itil tout Ayisyen - pètèt Gwadloupeyen, Sechelwa...tou?. Ni majorite ki poko alfabetize nan okenn lang yo, ni sila yo ki deja alfabetize nan lòt lang.
Respè,
Jaf