An repons a: Yon ti lis madichon! Guy S. Antoine te ekri a,
Guy S. Antoine afiche mesaj sa, jou 28 Mas 2001 a 22:50:05:
Men de lòt kategori mwen vle ajoute sou ti lis madichon an:14. moun vs. mounn
15a. vinn (pale w) vs. vin (pale w)
15b. finn (travay) vs. fin (travay)Petèt tout egzanp anlè yo kapab gwoupe nan menm kategori, men ak son diferan. Nan tout ka sa yo nou twouve moun ki teni pou yo ajoute yon "n" nan moun(n), nan vin(n), nan fin(n). Mwen pa t janm kapab konprann pou ki sa.
Men antouka, mwen kwè ti lis madichon sa a ap milite pou yon Akademi Kreyòl, ki p ap di nou kouman pou nou pale Kreyòl (se yon lang k ap evolye chak jou), men ki kapab di nou kouman nou fèt pou nou ekri nan yon fason inivèsèl ki kapab pase de jenerasyon a jenerasyon. Sa pa vle di ekriti lang la ap nesesèman fije non, men dimwens l ap kite stad kote tout moun ekri jan yo pito.
Si travay estandadizasyon ekriti kreyòl la fèt byen, li kapab bay anpil aktivite sa yo yon gwo bourad: Literati Ayisyèn lan, pedagoji ledikasyon pitit nou yo, metòd alfabetizasyon, piblikasyon liv ak jounal, resepsyon piblik la ba yo, kominikasyon pèsonèl e ofisyèl, san konte zouti nou gen dwa devlope pou pèmèt nou sèvi ak kreyòl la alèz nan "word processing", nan "spellcheckers", nan "e-mail", ak tout lòt sistèm otomatize ankò ki genyen. Twòp varyete ap retade nou, tandis ke estandadizasyon ekriti la ap fasilite tout pwojè travay sa yo.
Bourik fè pitit pou do l poze yon jou.