Jafrikayiti afiche mesaj sa, jou 05 Avril 2001 a 10:01:00:

Onè Milou,

Tyeke achiv Mwa desanm 1999 yo epi ou va remake yon brase lide ki te fèt sou sijè sa a.

Men ti moso nan mwenmenm mwen te di sou sa e jiskaprezan se pozisyon mwen sou kesyon an:
(Ou va remake nan mesaj orijinal la, alepòk mwen te konn itilize son «oun» nan toupatou. Kounye a, mwen bay vag paske mwen kwè se plis konfizyon chirepit sa lakòz pou granmesi. Kidonk anpil fwa ou li «youn», se «yon» mwen vle di)

"Se yon bagay ki toujou banm problèm.

Mwen pa konnen si gen okenn règleman gramatikal sou sa. Men, menm jan ak Guy, mwen
panse nou ta dwe kenbe ekriti non yo sou fòm orijinal yo.

Parekzanp: "Sean" se yon non meriken ki ekri epi pwononse yon mannyè ki pa koresponn ak
pwononsiyasyon ni kreyòl, ni franse. Si yon moun chwazi bay pitit li yon non konsa se pou
yo ekri epi pwononse non pitit la selon referans peyi kote li sòti a.

Si nou vle Ayisyanize non nou sa ka fèt san demi mezi. Sa vle di bay ti moun nou non ki
rasinen nan lan g Kreyòl tankou "Oukwèsebèl", "ChoublakAyiti", "zantrayanm" elatriye. Mwen
konnen nou poko rive nan kafou sa-a. Men, annatandan, mwen kwè sa kreye plis konfizyon lè
nou pran ekri non yon endividi plizyè fason alafwa.

Mwen konnen gen lòt ekzanp kote sa deja fèt nan plizyè lang tankou: Jésus, Jesus, Jesu, Yesu,
Jezi... Siman, sa rive paske non an sòti nan yon lang orijinal ki pa gen baz laten (parekzanp
Aramayik) epi plizyè pèp ki gen lang baz laten adapte li sou diferan fòm alafwa. Gendelè tou
anndan menm non ki sòti nan baz laten an gen modifikasyon ki fèt tankou: Christophe
Colomb, Christopher Columbus, Christopho Columbo...Men,mwen pa kwè tout jimnastik sa
yo toujou nesesè. Menm jan mwen pa panse li ta bon pou yon blan meriken chanje non yon
pitit mwen ta rele "Oukwèsebèl" pou li fèl tounen "Youknowsebel" osnon "Howbeautiful" ...,
mwen pa wè nesesite transfòme non Albert Einstein, Bill Clinton osnon
Jean-Francois Saint-Vi l.

Daprè mwen menm, pou evite konfizyon, se swa nou aksepte viv ak non kolonyal yo, adopte
lòt non etranje (Getchens, Adolph etc...) osnon nou kreye epi adopte non tou nèf ki rasinen
nan eksperyans nou kòm Ayisyen ki viv an kreyòl.

Jafrikayiti
"Libète pran pou ou pran-l"

-->