Ki sa yon "fo`m fije" ye nan grame` kreyol (bis)...

[ Kesyon Moun Mande Anpil ]

Michel DeGraff afiche mesaj sa, jou 13 Avril 2001 a 16:12:04:

Zanmi fowo`m kreyo`l, Bonswa!

Mwen te oblije fe` yon ti ralanti sou diskisyon yo
akoz de travay mwen, men mwen fe`k sot fe` yon ti
lekti sou de`nye diskisyon ki te fe`t sou grame`
kreyo`l. M ap bay Nikola Andre chapo ba pou bon ti koze
li te fe` sou pwoble`m "sanzatann", "dizan", etsetera.
Mwen tre` kontan esplikasyon Nikola bay sou rapo` ki
dwe egziste ant mo`foloji ak o`tograf. Nikola di
yon bagay ki enpo`tan tou sou diferans ant etimoloji
ak mo`foloji. Se yon diferans mwen te diskite nan
yon lo`t diskisyon sou fowo`m la e mwen kontan Nikola
montre enpo`tans diferans sa a nan diskisyon pa li a
tou.

Men gen yon bagay mwen pa konprann menm mwen ta renmen
Nikola esplike anvan mwen kontinye ak diskisyon an.
Mwen ta renmen Nikola ban mwen yon repons ki sistematik
pou mwen ka eseye konprann lojik li sou strikti fo`m
kankou "dizan", etsetera. La tou, mwen kwe` fo`k nou
eseye se`vi ak teyori mo`foloji pou nou eseye konprann
strikit lang nou an.

Kesyon m lan byen senp:

Ki jan Nikola defini ki sa yon "fo`m fije" ye? Ki
pwopriyete _lengwistik_ yon "fo`m fije" genyen ki
separe l de yon fo`m ki pa "fije"?

Repons sou kesyon sa yo ava pete`t ede m konprann
pou ki sa Nikola konsidere "dizan", "ventan",
"dize`", "katre`", etsetera, ko`m fo`m fije.
Mwen menm, sou bo` pa m, mwen pa konprann pou ki sa
fo`m sa yo ta dwe aji ko`m "fo`m fije". Men se ka
pete`t teyori mwen konnen pou "fo`m fije" pa
menm ak teyori pa Nikola a.

Kesyon sa yo se pa (vreman) kestyon sou o`tograf.
Se kesyon sou _grame`_mantal_ lokite` kreyo`l. Ki sa
lokite sa yo gen nan te`t yo ko`m konesans lengwistik
ki pe`me`t yon lengwis klasifye se`ten fo`m ko`m
"fo`m fije"?

Me`si davans.

-michel.

____________________________
MIT Linguistics & Philosophy
77 Massachusetts Ave
Cambridge MA 02139-4307
degraff@MIT.EDU
____________________________



Repons sou sijè sa: