An repons a: Ki meyè chemen noumenm ki nan dyspora a ta ka pran pou devlope lang manman nou an? Serge Bellegarde te ekri a,
Pwofèt Jozèf afiche mesaj sa, jou 21 Avril 2001 a 18:32:35:
Onè mon chè Serge.>>Fowòm sa ki fòse tout moun ekri nan lang manman yo, kèlkeswa pwofesyon w, se yon pakèt bagay li ye…..>>.
Wi mon chè Serge, fò nou di ayibobo pou REKA, espesyalman pou gwo travay patriyòt Guy Antoine ap fè nan jesyon katafal done k ap tonbe sou rèl do fowòm lan. Mwen dakò avèk ou. Fowòm sa se yon zouti endispansab pou pwomosyon lang ayisyen an. Men pou mwen, fowòm lan se youn nan mwayen ak yon voum lòt posibilite nou genyen pou n bouske.Ou te mansyonnen wòl tout moun k ap ekri (pwofesyonèl, mizisyen, chantè, sanba, elt.) dwe jwe nan respè òtograf lang lan ki enpòtan anpil. Mwen pa konnen si se aloufa ke m pi aloufa sou zafè pwomosyon lang lan. M remake pa gen enstitisyon Leta ayisyen ki twòp enplike nan pwomosyon ak avansman lang manman nou an ki se nanm nou ak pilye kilti pa n ou an, alòske se taks avèk enpo ayisyanofòn enstitisyon Leta sa yo ap fonksyonnen.
M sot li nan Ayiti an Mache (Haïti en Marche) jodi samdi a yon repòtaj ki pote tit "La Semaine de la francophonie en territoire créole" kote yon dividal Enstitisyon Leta ayisyen e wo fonksyonè te mobilize pou fete lang franse. Èske tout enstitisyon sa yo pral mobilize yo pou deklare mwa oktòk k ap vini an MWA LANG KREYÒL?
Fò nou tout soutni patriyòt Guy Antoine pou l ka kontinye kore Fowòm Ayisyen an, men nou ta dwe chèchè plis posilite pou avansman lang lan. Lide ki vin nan tèt mwen se ta kreyasyon yon Fon pou finanse kreyasyon ak pwodiksyon an kreyòl. Èske nou dakò avèk ti lide sila e kòman nou wè sa ta ka fèt?
Mèsi anpil.
Kenbe la.
Pwofèt
- Ki meyè chemen noumenm ki nan dyspora a ta ka pran pou devlope lang manman nou an? Serge Bellegarde 21/4/2001
- Ki meyè chemen noumenm ki nan dyspora a ta ka pran pou devlope lang manman nou an? Jafrikayiti 21/4/2001