Guy S. Antoine afiche mesaj sa, jou 13 Novanm 1999 e re-edite li jou 4 janvye 2003:

Nou pral fete bisantnè endepandans Ayiti.
Mwen vle rejwi anpil sou sa. Poutan mwen twouble pou plizyè rezon:

pwoblèm mizè a,

pwoblèm restavèk yo,

pwoblèm timoun k ap dòmi sou pewon yo, timoun san manman san papa,

pwoblèm abitan k ap kouri pou andeyò pou vin tonbe nan mizè lavil, kanntè ak zafra

pwoblèm ensekirite ak veye zenglendo k ap swiv ou toupatou,

pwoblèm moun yo touye ak dividal mechanste mete sou li,

pwoblèm politik chirepit ki fè politisyen pa ka met tèt ansanm pou fè peyi a vanse,

pwoblèm akizasyon k ap fèt dwat e goch tankou zeklè san okenn evidans
epi pèsonn pa pase nan jijman sinon lankètsepouswi,

pwoblèm vòlè enstitisyonèl ki blije moun peye pou dlo, elektrisite, ak telefòn
lè yo pa twouve ni dlo ni elektrisite ni telefòn,

pwoblèm profesè mal prepare, edikasyon jenès la k ap trennen nan labou,

pwoblèm ki anpeche ekzekitif la fè tout peyi respekte souverènte peyi d Ayiti,

pwoblèm kò jidisyè ki pa gen jarèt pou mete pi gwo kriminèl yo nan prizon,

pwoblèm Ayisyen k ap swe san nan batey dominiken, pou kòz grangou lakay la pi rèd,

Mezanmi ki sa n ap fè pou lè premye janvye 2004 la parèt sou nou,
nou pa rete chante sèlman "Pour le pays, pour les ancêtres...",
men pou nou kab selebre ak fyète memwa laviktwa zansèt yo te ranpòte
sou fòs kolonyalis, esklavajis, enperyalis yo?
Ki sa n ap fè pou montre san yo pat koule pou anyen?

Eske nan 2004
Dominiken va kontinye refoule Ayisyen tankou chen ki pa gen mèt?

Guy S. Antoine
Windows on Haiti


-->