Frantz Jean afiche mesaj sa, jou 16 Novanm 1999 a 09:24:33:
Kanmarad Guy fè youn bèl rale sou sitiyasyon peyi pa nou an e li poze pwoblèm yo klè kou dlo kokoye. Li pa rete la sèlman, li poze youn gwo kesyon ki fè mwen reflechi plis toujou. Mwen panse ke se pa mwen sèlman ki fè youn ti poze sou manman kesyon sa. Ki sa pou nou fè vre avan 2004 la rive? Eske n ap rete gade e plenyen pandan ke jou ap pase e lè ap rive sou nou san nou pa fè anyen. Sa mwen ka di sou sa? Mwen pa vle kontinye ap plenyen ankò san mwen pa fè efo. Mwen refize di ke nèg pap fè anyen. Mwen bouke di sa e mwen bouke plenyen. Kidonk mwen ta vle pwopoze ti lide sa. Nou ta ka debat li, vire l , chifonnen l, kraze l, jiskaske nou jwenn youn bagay ki ta ka pi fasil pi direk pou nou fè. Men lè mwen gade mwen wè ke nou tout ki deyò a sètadi noumenm ki nan dyaspora yo nou ka itilize asosyasyon rejyonal yo pou nou fè lide sa pase epi reyalize: eske nou pa ta ka mete men pou nou rebwaze peyi Dayiti anvan 2004? Nou ka fè youn jan pou nou fè plante youn ti pyebwa ki ta ka pote non nou nan zòn kote nou soti yo. Pou sa ka fèt tout bon nou ta ka ranje nou youn fason ke nou jwenn moun ki ka okipe sa pou nou, sètadi ki pran la swenyay pye bwa sa ki pote non nou jiskaske li pran fòm. Daprè mwenmenn si nou fè sa epi kòmanse travay sa anvan lan 2001 nou gen anpil chans pou nou wè peyi a rebwaze lè 2004 la rive. Sete youn ti lide. Mezanmi, jwèt la pou nou tout.
- Osijè: Sou koze selebrasyon 2004 la, an nou pale de rebwazman Serge Bellegarde 20/11/99
- Osijè: Sou koze selebrasyon 2004 la, an nou pale de rebwazman alexandra alexandre 18/11/99