An repons a: Sou koze selebrasyon 2004 la, an nou pale de rebwazman Frantz Jean te ekri jou 16 Novanm 1999 a 09:24:33,
Serge Bellegarde afiche mesaj sa, jou 20 Novanm 1999 a 16:03:52:
Sijesyon Kanmarad Frantz fè a bon anpil pou plizyè kòz. Li pèmèt pou tout moun mete men nan yon pwoblèm anvironman ki frape peyi a toupatou; li pèmèt tout Ayisyen, kit nan nò, kit nan sid, kit nan lès, kit nan lwès, pou yo tout mete men san depanse anpil lajan, epi sitou li pèmèt pou pwojè sa ta fèt nan yon estrikti byen chita.
Nan mèkredi ki sot pase la, Minis pou Ayisyen kap viv lòt bò dlo, Jean Généus, te pase nan Washington e nan yon ti rankont ki te fèt ak kominote-a, li tap di ki jan òganizasyon rejyonal ki tabli toupatou semen sa nan dyaspora e kap fè pwojè pou devlope diferan rejyon nan peyi Dayiti ap fè yon travay total kapital.
Kanmarad Frantz di ke nou taka chache yon moun ki pou ta okipe sa pou nou. Mwen ta val pi lwen. Mwen di ke chak òganizasyon rejyonal sa yo kap okipe devlope yon kote, yon vil, yon ti vilaj, yo ta ka anvisaje pou yo tout gen yon pwojè espesyal ki ta plante pye bwa nan tout zòn yap opere yo. Se konsa si yap okipe bati yon lopital, yo ta prevwa nan pwojè sa pou yo plante tan pye bwa. Si yap bati yon lekòl, yo kole dèyè pwojè sa yon plan pou plante pye bwa. Kididonk, nou ta vinn fè tout moun pran konsyans pou lè yap fè yon pwojè, pou yo toujou sonje anvironman, pou yo pa chita bati nenpòt ki jan. Si sa te kapab fèt yon jan systematik, gen òganizasyon entènasyonal ki ta ka menm dispoze pou fè kado lajan pou pwojè sa yo si yo wè se bagay serye kap regle.
Mwen kwè ke plis òganizasyon rejyonal pran plis reskonsabilite pou devlòpman diferan rejyon nan peyi, se plis ap gen pi bon rapò ant Ayisyen andedan peyi ak Ayisyen nan dyaspora, paske nou gen anpil travay pou nou fè toujou pou retire vye lide rivalite ki gen nan mitan de gwoup yon menm pèp ki, poutèt yon diktati san fwa ni lwa, blije fanm nan de moso, ousman pou pi korèk, nan plizyè moso.
Kididonk, mwen di ayibobo pou bèl lide Kanmarad Frantz voye monte a e mwen swete li taka reyalize, menm si se pa jan mwen sijere a. Gen lòt moun save ki dwe pi konnen bagay sa yo...