Ekriti non pwòp nan lang Kreyòl

[ Kesyon Moun Mande Anpil ]


jafrikayiti afiche mesaj sa, jou 21 Novanm 1999 a 09:52:36:

Mwen kontan wè mesaj Guy osijè ekriti non pwòp nan lang kreyòl Ayisyen an.

Se youn bagay ki toujou banm problèm.

Mwen pa konnen si gen okenn règleman gramatikal sou sa. Men, menm jan ak Guy, mwen panse nou ta dwe kenbe ekriti non yo sou fòm orijinal yo.

Ekzanp: "Sean" se youn non meriken ki ekri epi pwononse youn mannyè ki pa koresponn ak pwononsyasyon ni kreyòl, ni franse. Si youn mounn chwazi bay pitit li youn non konsa se pou yo ekri epi pwononse non pitit la selon referans peyi kote li sòti a.

Si nou vle Ayisyanize non nou sa ka fèt san demi mezi. Sa vle di bay ti mounn nou non ki rasinen nan lang Kreyòl tankou "Oukwèsebèl", "ChoublakAyiti", "zantrayanm" elatriye. Mwen konnen nou poko rive nan kafou sa-a. Men, annatandan, mwen kwè sa kreye plis konfizyon lè nou pran ekri non youn menm endividi plizyè fason alafwa.

Mwen konnen gen lòt ekzanp kote sa deja fèt nan plizyè lang tankou: Jésus, Jesus, Jesu, Yesu, Jezi... Siman, sa rive paske non an sòti nan youn lang orijinal ki pa gen baz laten (ekzanp Aramayik) epi plizyè pèp ki gen lang baz laten adapte li sou diferan fòm alafwa. Gendelè tou anndan menm non ki sòti nan baz laten an gen modifikasyon ki fèt tankou: Christophe Colomb, Christopher Columbus, Christopho Columbo...Men,mwen pa kwè tout jimnastik sa yo toujou nesesè. Menm jan mwen pa panse li ta bon pou youn blan meriken chanje non youn pitit mwen ta rele "Oukwèsebèl" pou li fèl tounen "Youknowsebel" osnon "Howbeautiful" ..., mwen pa wè nesesite transfòme non Albert Einstein, Bill Clinton osnon
Jean-Francois Saint-Vil.

Daprè mwen menm, pou evite konfizyon, se swa nou aksepte viv ak non kolonyal yo, adopte lòt non etranje (Getchens, Adolph etc...) osnon nou kreye epi adopte non tou nèf ki rasinen nan eksperyans nou kòm Ayiti ki viv an kreyòl.

Jafrikayiti
"Libète pran pou ou pran-l"





Repons sou sijè sa: