An repons a: Ann leve kanpe pou Ayiti Pwofèt Jozèf te ekri jou 23 Novanm 1999 a 11:50:13,
Joseph Sauveur Joseph afiche mesaj sa, jou 24 Novanm 1999 a 10:59:59:
Sijè sa a, kanmarad Pwofèt pale a, pa ta dwe kite okenn fanm vanyan ak gason kanson endiferan. Se pa jodi a sèlman gouvènman dominen ap poze zak degrenngòch sou frè nou ak sè nou k ap viv nan rès zile a. Si lè fè deklarasyon depaman sa a, li konnen pouki sa li fè li. Sa antre dirèk dirèk nan lojik plan gwo patwon li an gen pou Ayiti. Fòk nou pa bliye tout twoub y ap ba nou toujou kòmanse nan repouse Ayisyen ak dominiken nwa lòtbò fwontyè a. Si nou pa leve kanpe tout bon vre, listwa fèt kare repete. Fòk nou denonse nou denonse li tout kote nou pase ke gen kretyen vivan ki ka konprann. Si nou pa fè sa, l ap konnen nou ba li legen nan vye zak ak deklarasyon teyoris sa yo ki vlope ak yon kazak rasis devandèyè. Se depi tikonkonm t ap goumen ak berejèn, fòs reyaksyonè domiken ansanm ak alye l yo konprann se ak politik woulemdebò pou yo sèvi ak Ayiti. Yon bò, yo bezwen nou louvri vant mache nou an ba yo san kontwòl pou tout restan machandiz yo ka vann san yo pa pase ekzamen ak kontwòl. Yon lòt kote, yo bezwen itilize fòs ponyèt travayè ayisyen yo pou granmèsi. Men kou kat la mare katòz, osinon, lè yo vle geri bosko yo sou nou, sitou lè gen van briganday eleksyon begle je,oubyen kanwpranwkonnen k ap soufle, se malere de bra pandye sa yo k ap trimen nan batey yo ki peye po kase a. Se konsa, lè yo fin pran fòs kouray yo, tout byen yo ak tout sa yo posede kòm moun, pa menm idantite yo ak nasyonalite yo lage nan tchouboum. Yo pimpe yo ann Ayiti san kontwòl.
Lè gouvènman dominiken an fè deklarasyon kote li mande pou yo pran nou an chay, se pa yon pawòl tafya, fòk nou pran li omo. Li kreye tout kondisyon ki bay pawòl li a fòs. Pou nou ka leve eskanp figi nou devan devan deklarasyon gouvènman san manman domiken an, se pou tout Ayisyen konsekan ki gaye nan lemonn antye konsantre fòs nou nan bon jan òganizasyon kredib pou nou fè fòs fè nwa yo konnen rete trankil se remèd kò. Li ta pi bon pou yo si yo ta mete ti dlo nan diven fyèl bèf yo a, paske noumenm fanm vanyan ak gason kanson ki gen san Desalin ak lòt ewo yo k ap bouyi nan venn nou, nou pa dwe pran nan simtekonnen ni kaponnay pou nou pa kite twò ta bare nou. Nou p ap kite yo krache sou yon pèp fyè tankou nou. Se yon zak pwovokasyon ki pa antre nan okenn lojik diplomatik ki ta dwe ekziste ant de peye vwazen ki granmoun tèt yo. Kidonk, nou pa ka tann yo deside pou nou nan mòd salon diplomatik aganman yo a. Se nou pou sanble fòs nou pou nou di yo sa nou panse. Pi bonè se granmmaten. Jan w ranje kabann ou se konsa w kouche. Ann avan, Ayisyen vanyan, Ayisyen lakay ak Ayisyen deyò! Je fon kriye davans. Masaj n ap voye ba yo klè tankou dlo kokoye. Nou konnen zile a gen de pèp ki granmoun tèt yo ladan n, men nou pa konnen li gen yon nasyon blan ki separe ak yon nasyon nwa.
Zanmi kanmarad, pale anpil fè machwè gonfle. Twòp lapriye fè jenou kwochi. M chape poul mwen! M pwofite salye nou tout alawonnbadè k ap li ti refleksyon sa a. Ann nou rete solidè ak tout Ayisyen k ap batay pou fè yo rekonèt dwa pèp ayisyen an genyen tankou tout lòt pèp pou li viv libèlibè ak tout diyite li san li pa bezwen se vwazen k ap mande ipokritman pou yo pran li an chay.
Jozèf Sovè Jozèf
- Osijè: Ann leve kanpe pou Ayiti Anete 24/11/99