Pou youn souri ( Pwezi )

[ Kesyon Moun Mande Anpil ]

Michel-Ange Hyppolite afiche mesaj sa, jou 28 Novanm 1999 a 08:53:16:

Ou sène lespri-m
Nan sous zetwal
Ou se rèv jeklè-m
Ou nan rèv mwen
Plenmennuit
Dènye lide-m
Anvan somèy sere-m
Premye lide
Pou nanm mwen kenbe solèy

Ou sele-m
Nan souri-w
Mwen sèvi-w

Mwen te tè deseche
Ou boule-m
ak flanm pasyon
Sakle-m
Ak lam konviksyon
Gani-m
Ak sezon karès
Wouze-m
Ak kouran tandrès

Ou sele-m
Ak souri-w
Mwen sonde-w

Marasa twa a
Se branch nou,
Kavalye pòlka.
Semans wongòl
Degrennen
Lalin depaman
Sou fòs nou
Frany ilan-ilan
Kouwonnen tray memwa-n

Ou sele-m
Lasouri
Mwen sele-w

Tèks Mirenny,ki te parèt nan Jounal Ayiti An Mach jou mèkredi 17 novanm 1999 la nan paj 19 ( Ti gout paa ti gout)
Pou youn souri,
Se youn tèks mwen keyi pou madanm kè-m, ki pa bezwen ni alyans ni kout klòch.Pwezi se nan fon noumenm li donnen ak tout mounn nou renmen epi ki renmen nou , paske pwezi se lavi. Rezon ki fè mwen renmen tèks Mirenny an se chwa mo li yo, kadans tèks la epi esans imajis ki koule ladan an. Si nou remake byen son "S" la parèt tout anndan pwezi a. Sa vle se si mesaj ki pase anndan powèm lan dous nan chwa sèten mo, nou jwenn dousè a tou nan son lèt "S" la : sous, sène, souri,sele, sonde eksetera. Nan nivo senbòl menm, ki se boulpik teknik lekriti imajis la, Mirenny pa mennaje nou: solèy, sezon karès, semans wongòl, fòs eksetera. Se nan fason lektè a rive dekode mesaj ki nan kalite mo sa yo li pral jwenn fondasyon tèks la epi li kab rive kreye pwòp reyalite pa li ak pwòp eksperyans pa li nan li tèks la.
Kanta dezyèm estwòf la se sa nèt. Se imaj jaden an ak tout akseswa li ki koule nan mesaj Mirenny an.Gen youn efè sipriz tou nan refren tèks la . Ofiramezi lektè a ap desann li ka remake youn ti diplis nan refren tèks la ki parèt ak mo ki gen de silab sèlman: Souri ak sèvi, souri ak sonde, souri ak sele . Nan chwa mo sa yo nou kab dekouvri youn mesaj kiltirèl natifnatal. Mwen prefere kite nou dekouvri mesaj poukont nou kòm ekzèsis pèsonèl nou nan chan imajis la.
Chak fwa mwen chwazi youn pwezi pou mwen pataje ak nou, mwen va toujou di nou poukisa mwen chwazi li. Rezon an, se pou mwen bay lektè ki enterese nan pwezi kreyòl la modèl travay suivan jan mwenmenm mwen remake evolisyon pwezi kreyòl Ayiti a depi alantou anen katreven yo . Atansyon!! Se pa tèks pwezi imajis ase ki bèl, men preferans mwen ale nan sans imajis la.
Ak Onè respè
"Michel-Ange Hyppolite", nan "Ottawa"

Repons sou sijè sa: