An repons a: ou menm, Ayisyen k ap viv Deyò, Jwèt pou ou! Dahoud Andre te ekri jou 12 Janvye 2000 a 01:42:36,
François-Marie Michel afiche mesaj sa, jou 12 Janvye 2000 a 21:54:21:
Kanmarad, m pa vle tann twòp pou m remèsye w kòm on konpatriyòt ki gen lè pa dòmi san l pa reve Ayiti. Fò m pa bay lide: mwen, se wonfle menm m ap wonfle. Kidonk m ap di de mo sou koze bay 1% an, menmsi m pa fin pare. M dwe ajoute koze a pa fasil nonpli.
Premyèman, gen lwa ki pou ta chouke koze a nan fonksyònman dizyèm lan. Men kijan pou lwa mande moun dizyèm peye taks san yo pa gen dwa ata vote?
Dezyèmman, koalisyon 16 desanm lan ki te gen tout kapasite melanje ak pouvwa f on bagay konsa, san grate tèt, eklate an migan, epi dizyèm lan ap gade sa, ak prèv nan men, li pa vèmisèl nan lasoup desizyon k ap pran anndan peyi a.
Twazyèmman, Ministè dizyèm depatman an, magre jèfò Minis Jeneis, pankò rive jwenn yon èstrateji ki pou mobilize dizyèm lan, ni konèkte (rekonèkte pou m te di) enterè dizyèm lan ake politik peyi Dayiti. E se twouve taks, s on koze ki makònen ak ni politik ni administrasyon. Alòske moun ap plenyen-di administrasyon an se yon nich kòripsyon. Anverite koze a delika
Angwo, m pa vle di n ap tann poul gen dan; men gen anpil travay ki pou ta fèt, e balon an nan men tout on ekip ki anndan peyi a: gouvènman an an premye ki pou ta di sa l ta fè pou administre yon lajan konsa. San konte pankò gen lachanm, ki pou ta rekonèt yon chapant administrasyon, moun touledis depatman yo ta anchaje....
Koze a pankò prèt ap fini.
Ankouraje kanmarad.