An repons a: Ajisteman Estriktirèl astrel mathieu te ekri jou 29 Janvye 2000 a 06:28:54,
jafrikayiti afiche mesaj sa, jou 31 Janvye 2000 a 12:10:40:
Respè Astrèl Mathieu,Ou di "SAP petet yon solysyon pou resoud pwoblem peyman det extern Ayiti min pa yon solysyon
pou amelyore strikti pou yon avni miyo."Sa se gwo koze. Se ekzakteman sa lidè peyi ekonomi kokobe yo (Ayiti elatriye...)dwe chèche konprann.
Menm jan ou jwenn yon pakèt pitit peyi a ki depanse milyon ven nan inivèsite lòt bò dlo pou etidye levanjil ekonomik selon Sen Blan, epi yo retounen ale pwopaje "bòn nouvèl" pete fyèl sa a nan pwòp peyi yo. Se menm jan peyi rich yo twò kontan fòme pè pastè nan relijyon pa yo pou tounen vini antòtye sèvèl popilasyon lakay nou ak sipèstisyon Ewosantrik ki favorize Enperyalis Kiltirèl anfavè Blan.
Sa vle di: SAP se yon estrateji enperyalis ki la pou pèmèt peyi nou yo gen estrikti ki touskilfo pou pimpe ti lajan nou reyisi ekonomize a lòtbo dlo.
Yo pwopoze nou Ajiste Estrikti peyi a pou yo.Anreyalite sa nou bezwen fè, se Ajiste lespri nou pou nou konprann nesiste epi mwayen pou nou Ajiste Estrikti peyi a pou NOUMENM!
Epitou osijè kesyon dèt sa a?Ki jou nou va reyisi genyen lidè alawotè ki va fè youn sèl leve kanpe pou yo di: Nou pap fout peye ankò !
Dèt sa yo se dèt Divalye (depanse nan peyi Lafrans, Etazini, Laswis ak konplisite Lafrans, Etazini Laswis elatriye)
se dèt Bokasa (ak konplis Ewopeyen li yo), Raoul Cedras (ak konplis Etazinyen li yo).... poukisa se malere ki dwe peye pou yo?Epitou, Annou palede dèt. Premye dèt ki merite reparasyon, se dèt blan Ewopeyen genyen annegad noumenm sivivan gwo tribilasyon an (1499- 1880) kote nou pase plis pase 300 zan ap travay san touche epi anba tout kalite kriyote sovajri pou anrichi Lafrans, Angletè, Lespay ak tout rès kontinan Lewòp la.
Noumenm Afriken ki Ayiti yo nou te fwenk mete yon fren nan sa depi 1804 men rès fanmi a ki epapiye toupatou sou rès kontinan an te kontinye ap sibi anba mati lesklavay. Epi, anplis Lafrans vòlè $150 milyon Fran Lò (Zenglendoman) anvan lè retire menas retounen Ayiti vini fè moun zak sovajri ankò. Sa vle anplis tout lòt dèt san ki sal men li, Lafrans dwe Ayiti plizyè Trilyon Dola pou zak zenglendo Chal X la.
Kouzen Randall Robinson fenk sòti youn liv sou sa ki rele "The Debt". Lè Blan Ewopeyen yo va reyisi kite sanwont epi peye dèt sa a (Ke n'ap fòse yo peye kanmenm!), menmsi nou ta vle pran pòz sòt nou epi peye dèt Divalye, Bokasa ak Cedras, nou ap rete plizyè Trilyon dola nan men nou pou nou rekontrui pèp nou yo toupatou sou planèt la.
Kidonk, sa nou bezwen se mwen nèg molas, mwens maryonèt (tankou sa ki nan Loni a (Coffee please Hanan!)) epi plis fanm vanyan ak gason kanson opouvwa nan peyi nou yo.
Jafrikayiti
"Desyèkansèk je vèt vin pi akrèk" ~ Si~ Beethova Obas)