An repons a: Lang Kreyòl la andanje! Michel-Ange Hyppolite te ekri a,
Pwofèt Jozèf afiche mesaj sa, jou 20 Mas 2000 a 05:29:37:
Mèsi kanmarad Michel-Ange. Men kèk pwen nan ti rale mwen te fè a sou zafè aprantisaj konsyan lang ak idantite kiltirèl nan lekòl primè ak segondè. Tout jenn k ap grandi ansanm sou yon tèritwa,ap evolye nan yon espas kote gen yon lang ak yon kilti ki se espresyon idantite endividi sila yo.Wòl lekòl primè ak segondè nan tout peyi, se bay jenn yo chans pou aprann e metrize lang manman yo ak kilti yo dabò. Depi yon jenn fin maton nan lang ni e konnen pwofondè rasin idantite kiltirèl pa li a, l ap vin gen yon pwen referans solid ki pral pèmèt li aprann pi byen yon lòt lang ak yon lòt kilti, nan konpare s ak ki gen nan eritaj ak dyakout kilti ak estrikti lengwistik pa l parapò ak yon lòt lang oswa yon lòt kilti. Se sa ki jistifye ti chanjman ki pou ta fèt nan Kourikoulòm edikasyon lakay sou kesyon deplasman literati etranje nan premye ane inivèsite a dekwa lè elèv yo rive pou yo aprann yon lòt inivè kiltirèl pou sa k ap fèt konsyamman e pa sou fòm enkiltirasyon ni akiltirasyon.
Kenbe Fèm.
Pwofèt
Monreyal