Zanmi yo,
Padone kokenn reta sa a men kanmenm ou fèt pou konnen ke aswè a Jedi 30 Septanm 99 gen yon gwoup ki rele Konbit Vijilans k ap fè yon ti chita koze nan New York la pou sonje 30 Septanm 1991.
Depi 6PM jouk 9PM ap gen yon chita koze nan lokal St. Francis nan Brooklyn ki nan Lincoln Rd ak Nostrand Ave tou pre Empire Blvd (Rantre a nan "Parking" legliz la) sou dat sa a ki te pote soufrans men tou te mennen yon bèl tèt kole ak militans nan kalandriye batay Pèp Ayisyen an.
N ap pase film dokimantè "Haiti: Killing the Dream" (vèsyon Kreyòl) epi apre n ap gen ti diskisyon sou sa dat sa a pote. N ap ankouraje patisipasyon tout moun men sitou pakèt viktim dirèk kou deta sa a ki depi plizyè lannen ap viv nan zòn NY la ak nou.
Rantre a gratis epitou n ap separe ti soloba ak zanmi ki vini yo.
Mèsi.
Yon ti nòt sou Konbit Vijilans:
Se yon ti gwoupman kèk militan nan zòn New York la deside mete sou pye pou veye epi ede Ayisyen nan devwa nou pou nou sonje. Nou toujou di "bay k ou bliye pote mak sonje" men anpil lè nan mitan batay pou lavi n ap mennen chak jou nou bliye sonje/komemore/selebre dat enpòtan ki make listwa nou kòm pèp. Si nou pa bay dat ak levènman sa yo valè pa gen moun k ap fè sa pou nou. Si nou pa ba yo valè, nou menm tou nou pa p gen valè.
Konbit Vijilans bay tèt li devwa pou selebre dat sa yo epi tou pou ankouraje tout lòt Ayisyen ak gwoupman Ayisyen pou selebre yo tou nan fason pa yo. Nou rankontre chak Samdi 6PM-9PM nan Brooklyn, NY nan lokal St. Francis la (Nostrand Ave. ak Lincoln Rd.). Nou ankouraje tout moun ki ta renmen wè travay sa a vanse pou vini kole zepòl ak nou oswa rele n ak sijesyon yo pou n ka rive pi lwen.
Pou Plis Enfòmasyon, rele
718-672-6060
718-835-2695
Follow Ups:
- Re: Aktivite nan New York pou Komemore 30 Septanm 1991 Guy Antoine 9/30/99 (2)
- Re: Aktivite nan New York pou Komemore 30 Septanm 1991 jafrikayiti 10/01/99 (1)
- Re: Aktivite nan New York pou Komemore 30 Septanm 1991 Dadou 10/02/99 (0)