Viv Bondye! Aba Relijyon!

[ Kesyon Moun Mande Anpil ]

Guy Antoine afiche mesaj sa, jou 07 Me 2000 a 18:30:29:

Jan, etandone ou fèt parèt avèk premye liv ou, mwen gen dezoutwa ti kesyon pou ou, mwen ta kontan si ou pran tan pou reponn yo pou tout moun ki enterese nan repons yo:

Eske ou ta ka di nou kisa ki te motive ou ekri liv sa, e ki kalite efè ou ta renmen wè liv sa kreye nan kominote a?

Mwen remake ou te pran de desizyon ki riske fè ou pa vann liv la nan grann kantite kòmsadwa, men jan mwen konnen ou, mwen kwè ou pran desizyon sa yo ak tout sanfwa ou.

Premye desizyon an, sè ke ou pibliye liv la dabò an Kreyòl, ou pa fè li an Franse oubyen an Angle. Eske liv la pa ta vann pi byen, si ou te ekri li nan bon jan Franse tulututu? Eske ou panse kominote Ayisyen an pare toutbonvre pou li sipòte otè ki ekri liv an Kreyòl?

Dezyèm desizyon an, se tit liv la. Mwen panse fòk ou gen fyèl pou chwazi tit sa pou liv la paske pèp Ayisyen an se yon pèp ki kwè nan relijyon rèd mare, kidonk ou riske fanatik yo rejete efò ou fè la avan menm yo pran konsyans agiman ou pote yo; yo gen dwa atake ou san yo pa menm konnen kisa ou te di. Eske ou deja pare mantalman pou ou fè fas a sa?

Finalman, mwen konnen distribisyon liv la fèt kòmanse, e mwen ta swete Kreyolis yo ki vini sou Fowòm Kreyòl la pran yon ti tan pou yo plase yon kòmand pèsonèl pou yo ankouraje inisyativ sa, men mwen ta renmen konnen si gen kèk ti detay ou istwa enteresan ou ta renmen pataje avèk nou osijè devlopman liv la, osnon vant liv la, osnon reyaksyon ou deja resevwa sou sa?

Monchè, mwen preske fini liv la, mwen fè ou anpil konpliman paske li enteresan tout bon. Mwen ta renmen wè anpil diskisyon mare sou liv la nan Fowòm Kreyòl la.


Repons sou sijè sa: