An repons a: Viv Bondye! Aba Relijyon! - Vant liv la sou WOH Dahoud Andre te ekri a,
Guy Antoine afiche mesaj sa, jou 08 Me 2000 a 10:12:31:
Monchè Dahoud, sa ou di la gen anpil merit, men se pa reflechi otè liv la ni WHO pa te reflechi sou sa. Sa Jan bezwen se bon jan piblisite pou liv li a. Sa WHO bezwen se yon modèl ki pou pèmèt li siviv. Kidonk nou deside eksperimante pou nou wè si genyen yon fason pou youn ta ede lòt. Mwen pa bezwen rantre nan detay pou mwen ta di ou ke WOH ta bezwen vann 10,000 kopi liv Jan an pou sa ta fè yon diferans pou nou tout bon devan depans nou fè pèsonèlman pou sit la depi nou kòmanse. Sa WOH ap chache se yon modèl li ka anplwaye pi devan pou pèmèt sit la vanse. Si sa mache, se byen. Si sa pa mache, nou va kontinye chache toujou.
Nan yon ti eksperyans mwen sòt fè, mwen te ofri e mwen kontinye ofri vant yon CD yo rele Kilti-Shok. Mwen te ba tout moun de jan pou yo peye pou li: voye yon chèk sou adrès GAJMA, oubyen peye pou li sou kat kredi atravè Amazon.com. 90% (san ekzajerasyon!) nan moun ki kòmande CD yo te prefere kòmande li atravè Amazon.com. Mande m pou kisa, mwen pa konnen, men mwen kwè se sa Ameriken rele "consumer psychology", sètadi dispozisyon ki pou you rezon ou yon lòt fè yon achtè aji nan yon sans ou nan yon lòt. Pou moun k ap fè biznis, se pa rezon yo ki pi enpòtan, se efè yo.
Si ou konnen lòt fason nou ta kapab chwazi pou vann liv la sou entènèt la, ki kapab efektif, mwen kwè ni Jan ni mwenmenm, ni lòt manm REKA yo, ta apresye ou pataje lide sa yo avèk nou nan yon korespondans pèsonèl ki pa oblije nou mete tout detay biznis lan piblik, paske pa gen lòt biznis ki aji konsa. Nou konte sou konkou ou, pa lage nou, ni pa mete nou nan tèt chaje. Objektif nou se youn ki pou ede lòt.
Mwen sezi wè ou parèt ak solisyon "paypal.com" la, e mwen konplimante ou sou sa, paske sa demontre ke oumenm ou rete sou frontyè devlòpman k ap fèt sou entènèt la. Malerezman, gen si mwa desa mwen te voye enfòmasyon "paypal" la ba yon ventèn demoun konsa. Tout se te fanmi mwen ak zanmi mwen ki sou entènèt la depi kèk tan deja. Youn nan yo pa siyen, paske yo pa te janm tande pale de "paypal.com". Tout agiman mwen te ba yo pa te sèvi anyen. Yo rete sou pozisyon yo, yo pa bouje, yo pa fè konpayi an konfyans. Mwen voye atik "Wall Street Journal" ba yo, mwen voye lòt enfòmasyon toujou, adje se betize mwen t ap betize. Finalman, mwen ba yo legen, mwen di tèt mwen: kominote nou an pakò prèt pou li pare pou li anbrase avans k ap fèt sou entènèt la. Men petèt se te you move konklizyon. Petèt se fanmi mwen ak zanmi mwen ki pakò pare.
Men mwen dakò avèk ou nan rezònman ou fè ke "paypal.com", se yon mwayen ki devlope ki ta pèmèt otè yo resevwa lajan pou liv yo san yo pa bezwen pase pa Amazon.com (san yo pa bezwen pase pa WOH nonplis) si moun yo prefere itilize kat kredi yo. Lage koze a deyò, Dahoud. Sou pwen sa, mwen sipòte ou. Sèl kesyon se, eske kominote a pare pou bon jan solisyon sa yo?
Finalman, mwen envite Jan pou li voye monte yon ti nòt pou di tout moun kòman yo kapab kòmande liv la tou oubyen dirèkteman nan men li, oubyen nan libreri Mapou nan Miyami. Byenke m ofri nou yon mwayen pou nou kòmande liv la atravè Amazon, paske pou you rezon ki pi gran pase nou laplipa pami nou fè Amazon yon kòkennchenn konfyans, mwen kwè objektif ki pi enpòtan an, se vann plis liv ke posib, se simaye konesans lan.
Si WOH ta profite piblisite l ap fè la, pou tout efò mwen fè pou mwen devlope paj yo, m ap rele "Viv Bondye!". Si Jan ta resi vann pliske mil ou senkmil ou dimil ekzanplè dirèk dirèk, e mwenmenm mwen pa ta fè senk kòb ladann, m ap rele tou "Viv Bondye!" Paske sa ki enpòtan toutbonvre, se liv la ki pou chita nan men ou, kèlkanswa jan ou va deside kòmande li. Mwen espere Jan a ban nou plis limyè sou tout mwayen nou gen devan nou pou nou fè sa.