Viv Bondye! Aba Relijyon!

[ Kesyon Moun Mande Anpil ]

An repons a: Viv Bondye! Aba Relijyon! Nekita te ekri a,

Lunine Pierre-Jerome afiche mesaj sa, jou 09 Me 2000 a 16:14:48:

M li tout kòmantè k ap fèt sou Viv Bondye Aba Relijyon! M dakò se yon liv ki gen yon tit trè provokatif e ki fè anpil kesyonnman, espesyalman sou orijin relijyon kretyen an ki mete nou menm pèp lafrik nan yon banm tèt chaje. M te gen chans pou m li liv la e pou m fè kesyonman pa m sou apwòch otè a. An fèt, otè a gen yon apwòch trè dyalektik. Si yon moun deja li Politzer, ou kapab di se yon lòt Politzer Ayisyen. Men, otè a pa rete la sèlman, piske li mete anpil chalè nan ekri l. Plis w ap li, se plis ou anvi li, e se plis tou ou gen kesyon. Anpil nan kesyon sa yo otè a reponn yo. Genyen tou, li envite lektè yo a reflechi sou yo, yon refleksyon ki ta dwe debouche sou pi gwo deba nan fowòm nan oubyen nan lòt sèk.

Otè a klè sou pozisyon l pa rapò a egzistans Bondye! Pa gen dout nan sa! Natirèlman, li manyen fen e byen sistèm relijyon kretyen, e l fè m menm mande sa nou menm Ayisyen ki gen rasin nou nan lafrik ap chache nan kristyanis. Anfèt, tit liv la menm esplike l klèman otè a kwè nan Bondye. Yon Bondye ki gen anpil lòt non, depann de afinite relijye moun nan.

Viv Bondye Aba Relijyon! Se yon liv tout Ayisyen konsekan ta dwe li. Li gen yon bout pou chak moun. Kit ou te relijye ou pa. Liv la dezabiye anpil nan etikèt zòt mete sou pèp mwa, sitou vye lide san fondman ki vle fè nou konprann nwa pa entèlijan. Otè a touche tou kesyon fanm nan e kijan labib limenm sijere e menm ankouraje tretman fanm nan ap sibi debi digtantan an. Yon kesyon ki tou makònen ak lesklavaj piske labib limenm daprè otè a te ankouraje lesklavaj.

Youn nan aspè ki pi enpòtan nan liv la se paske otè a pa ret chita sou yon “voye monte” an kreyòl. Li fè rechèch li kòm sa dwa e li vini ak prèv epi referans si toutfwa yon moun ta vle kontinye kote l kanpe a oubyen ta chwazi yon aspè pou l devlope plis. Kèk limitasyon liv la genyen se fot frap ak desen yo ki pa byen soti. Men, tout moun ka konprann rate resous ekonomik pa bay otè Ayisyen chans pou yo fè bròdè nan prezantasyon.

Viv Bondye Aba Relijyon! Ouvè pòt pou anpil lòt rechèch nan domèn sa a. M ankouraje tout moun ki konn li pou yo li liv la e pataje ti mòso ak sila yo ki pa konn li yo. M ap di Jafrikayiti konpliman pou travay li e m swete l kontinye nan wout la. Li menm ki gen zye pou l wè, zòrèy pou l tande e sitou yon brenn pou l konprann, l ava kleri chimen pou lèzòt yo ki jouskounye a anchennen envolontèman.

Lunine Pierre-Jerome


Repons sou sijè sa: