Viv Bondye! Aba Relijyon!

[ Kesyon Moun Mande Anpil ]

An repons a: Viv Bondye! Aba Relijyon! Lunine Pierre-Jerome te ekri a,

Jafrikayiti afiche mesaj sa, jou 09 Me 2000 a 21:52:22:

Onè-respè pou ou Lunine!

Nan mesaj wololoy ou voye oijè liv la ou ekri:

"Otè a touche tou kesyon fanm nan e kijan labib limenm sijere e menm ankouraje tretman fanm nan ap sibi depi digtantan an. Yon kesyon ki tou makònen ak lesklavaj piske labib limenm daprè otè a te ankouraje lesklavaj.

Daprèzavwa mwen rekonèt se pa tout moun ki pase nan fowòm nan ki pral franchi etap achte liv la. Epi, daprèzavwa fòk laverite blayi "by any means necessary", mwen ta renmen bay de twa referans ki parèt aklè nan liv la osijè pozisyon anti-fanm ak pozisyon dansekole ak lesklavaj ki parèt aklè nan Bib la.

Fòk mwen admèt lè mwen te koumanse travay la mwen pat menm okouran ekzistans tèks sa yo. Kidonk se pantan mwen te pantan sou yo.

TEKS ANTI-FANM NAN BIB LA

"...Men de grenn ekzanp pami yon dividal ki nan tout kò Bib la:
(La a se apot Pòl k ap pale) «Tankou sa fèt nan tout legliz pèp Bondye a, fanm pa fèt pou pale nan asanble yo. Yo pa ba yo dwa sa a. Jan nou jwenn sa ekri nan lalwa Bondye a: se pou yo soumèt yo. Si yo bezwen mande kichòy, yo va mande mari yo lè yo lakay yo. Non! Sa pa fèt pou fanm yo pale nan asanble a» (1Korent chapit 14 vèsè 33-35)
«Kris la se chèf tout gason, gason se chèf fanm. Bondye se chèf Kris la…si se yon wont pou yon fanm koupe cheve li osinon pou li kale tèt li, se pou li kouvri tèt li tou. Gason an pa bezwen kouvri tèt li, paske se pòtre Bondye li ye. Tankou nan yon glas li fè wè pouvwa Bondye a. Men, fanm nan menm se pouvwa gason an li fè wè. Paske se pat avèk moso nan kò yon fanm Bondye te kreye gason, se avèk moso nan kò yon gason li te fè fanm. Se pa pou fanm nan Bondye te kreye gason an, men se pou gason an Bondye te kreye fanm nan. Se poutèt sa, akòz zanj Bondye yo, fanm nan dwe pote yon mak sou tèt li pou montre li soumèt anba otorite mari li…» (1 Korent chapit 11 vèsè 3, 6-10). Toutsa, san konte yon dividal kòmantè, jijman, kòmandman seksis nou jwenn ni nan Ansyen Kontra, ni nan Nouvo Kontra - tout alawonnbadè se makdwèt moun, sitou makdwèt gason blan Juif-Ewopeyen."

Viv Bondye, aba Relijyon! paj 101

TEKS RASIS NAN BIB LA KI FÈ KWÈ BONDYE DANSEKOLE AK TOUT KALITE LENJISTIS, MENM LESKLAVAJ.

"Alewè: Ebre 11 v 33 «Ak konfyans yo te gen nan Bondye, yo te goumen, yo pran peyi lòt moun nan men yo…" ; Levitik 25 v 42 «….Yo pa gen dwa vann nou pou fè esklav lòt moun. Pingga nou aji mal ak moun pèp Izrayèl parèy nou yo» v 44 ak 45 «Lè nou va bezwen gason osinon fi pou sèvi esklav lakay nou, nou ka achte yo nan pami moun lòt nasyon ki ap viv lòt bò fwontyè peyi nou an. Nou ka achte pitit moun lòt nasyon ki ap viv nan mitan nou tou. Konsa tou, lè yo rete lakay nou, si yo fè pitit sou tè ki pou nou, pitit yo va pou nou tou. Nou va kite yo tankou byen pou pitit nou yo. Yo va sèvi nou jouk yo mouri…».

...Gen yon vèsè nan liv ki pote non Pyè yo ki si tèlman reyaksyonè, gwo chabrak tradiktè yo evite itilize mo "esklav" la, men lè ou li tèks la epi konpare li ak lòt tèks ki repete menm lide degrenndwat sa a (alewè: Efèz 6 vèsè 5 rive sou 8) ou konprann aklè se ekzakteman osijè lesklavaj li ap pale. I Pyè 2 vèsè 18 di nou «Noumenm "domestik" yo, nou fèt pou nou soumèt devan mèt nou yo avèk tout respè yo merite. Pa sèlman devan mèt ki bon yo, mèt ki gen bon kè yo, men devan mèt ki gen karaktè difisil yo tou…Bondye va beni nou, si lè yo ap fè nou soufri pou sa nou pa fè, nou sipòte lafliksyon an paske nou konnen se sa Bondye vle ». Viv lesklavaj ak lenjistis! Amen!."

Viv Bondye, aba Relijyon!, paj 100.


Atansyon: Lè ou bouske limyè sou kijan mesyedam yo te kolepyese liv yo rele Bib la, pa gen anyen etonan ni destabilizatè nan prezans tèks seksis-rasis sa yo nan liv yo vle fè nou aksepte kòm pawòl Bondye a.
Imajine sa ki ta rive si ou ta bay Dessalines, Kapwalamò ak Bwawontonè ekri yon liv listwa Lafrans pou tout ti franse aprann pakè. Imajine...





Repons sou sijè sa: