Kout kiyè kinan m pou fè komès kinan nou an mache!

[ Kesyon Moun Mande Anpil ]

Dahoud Andre afiche mesaj sa, jou 09 Me 2000 a 23:34:39:

Fanmi yo, Bonswa

Anvan jafrikayiti fin pibliye tout liv la nèt nan pakèt repons l ap bay yo, m vle achte liv pa m atravè WOH men se pa desizyon m pou m bay blan manje kote m ka bay frè m (m vle di yon frè ki pi pre m kòmetan nou tout se frè). M ankouraje REKAyis yo ak tout lòt vizitè nan lakou a trase yon bèl ekzanp pou montre nou konnen pou nou senyen pou moun ki senyen pou nou epi pou nou pase kreyon sou pawòl ki di liv kreyòl pa vann nan. Mwen m konnen se yon blag. Se tankou yo t a vle fèm konprann tout liv ki nan lòt lang vann san grate tèt.

Ki jan sa k a fèt:

Kòm etan Guy gen tan genyen yon kont ak paypal, mwen ap sijere nou koumanse fè lavant liv la mache san pèdi tan. Mwen ap sèvi ak sistèm paypal la depi plizyè mwa pou m achte epi vann kichòy atravè entènèt epi m panko janm gen pwoblèm.
Se yon sistèm ki pèmèt 2 moun ki gen email fè tranzaksyon lajan atravè email la nan tout sekirite depi moun k ap voye kòb la gen yon kanè bank oswa yon kat kredi oubyen kat "debit" oubyen voye mete kòb nan yon kont ou ouvri ak paypal la dirèkteman.

Sa pa koute ni moun ki voye a, ni moun ki resevwa a anyen. Vòlè yo (paske fò ou ta vòlè sèlman pou fè kalkil sa a) fè kòb yo nan enterè yo fè pandan lajan an ap dòmi lakay yo. Si m achte liv la nan men Guy (WOH), epi m email kòb la atravè paypal, paypal voye yon email bay Guy pou di l li gen yon kòb k ap tann li. Yo retire kòb la imedyatman (tankou nenpòt tranzaksyon sou kat kredi) nan kote m di yo pran kòb la men nan tan li pran pou Guy mande yo epi jwenn kòb la (2-5 jou) nan kont pa li, konpayi a gen tan fè yon ti bagay sou li. Lè gen yon pil ak yon pakèt moun k ap fè tranzaksyon konsa, y ap fè bèl lajan.

Yonn nan difikilte sistèm nan se pou Etazini sèlman li mache men m si anvan lontan l ap tout kote depi kèk bon pirat entènèt (tewowis modèn) pa pete kannkès yo. M konnen anpil moun pè tranzaksyon entènèt men wè pa wè se nan kalfou sa a sosyete n ap viv la prale. Sa m sijere tout moun se pa bay pèsonn kat blanch nan kote manman lajan an sere. Kreye ti kont apa pou tranzaksyon sa yo pou si malè rive ou pa pèdi tout. M gen pase 4 lannen depi m ap fè tranzaksyon lajan nan entènèt la, m pa regrèt anyen. M panko janm pèdi kòb epitou m rive achte yon seri bagay m pa t ap janm jwenn nan boutik bò lakay mwen. Mwen vann moun byen lwen nan peyi m pa menm konn tande kichòy moun nan zòn mwen tchwipe.

Pou fè istwa a kout, Guy ap sèlman bay lyen pa li nan paypal la epi n apral ladan l, si n panko anrejistre, anrejistre epi n ap email Guy lajan liv la oswa nenpòt lòt kichòy Guy gen pou vann nan lakou a. Depi Guy jwenn email la, menm jou a li ka voye liv la pou nou.

M ap ankouraje Guy kenbe lyen amazon nan pou moun ki deyò Etazini yo epi pou lòt moun k ap fè fenyan malgre se menm teknoloji sekirite amazon nan paypal sèvi tou.

Guy vyefrè, jwèt pou ou.

Ak respè,
Dahoud

Repons sou sijè sa: