Yon kesyon sou Kreyòl pou Gifrants ak lòt moun

[ Kesyon Moun Mande Anpil ]

An repons a: Yon kesyon sou Kreyòl pou Gifrants ak lòt moun Gifrants te ekri a,

Michel-Ange Hhyppolite afiche mesaj sa, jou 28 Me 2000 a 19:37:49:


Mwen pa konnen si mwen konprann byen, men se kòmsi mwen santi nou vle di devlopman pakab fèt ak lanng kreyòl la.
Si nan tèt nou devlopman Ayiti dwe fèt nan menm liy ak devlopman peyi ki fin souse peyi ki vin pòv jounen jodi yo, mwen kwè nou fè youn erè . Chak peyi gen fason pa li pou li mache . Nou pa dwe ap konpare peyi a epi ak lòt peyi ki fin rive deja .
Si nou fè youn koudèy nou va wè tout sa ki ap fèt Ayiti, menmsi nan tèt mounn yo li soti an franse ,depi li rive nan faz reyalizasyon an se an kreyòl li reyalize. Nou kab kòmanse sou wout pou nou rive nan konstriksyon izin.
Kondi Jacques Stephen Alexis te di : Si ta gen malè mande tout Ayisyen pou yo sispann pale kreyòl peyi ta pe kanpe.Pa gen anyen ki ap fèt Ayiti pou se pa an kreyòl li fèt.
Epitou, premye etap pou devlopman Ayiti nan epòk nou ap viv la a, epòk kominikasyon an, se montre tout mounn li nan pwòp lanng pa yo, kreyòl . Se konsa nou ap rive ba yo zouti ki adapte pou yo epi yomenm tou yo kab sèvi ak zouti sa yo pou yo devlope tèt yo pwojè ki nan nivo yo ki koresponn ak bezwen yo eksetera .
Se sèten nou dwe gen mounn ki pou espesyalize yo nan tout lòt kalite lanng , men se pa peyi a kòmtèl ki pou oblije kole ak youn lanng etranje pou li fè devlopman. Atansyon mwen pa kont okenn lanng etranje. Poudayè, plis nou konnen lòt lanng se plis li ap bon pou nou.
Devlopman se anpil lòt bagay, men tou devlopman se ekonomi . Ekonomi youn peyi pa chita sou ki kalite lanng li pale li chita sou kalite travay mounn ki anndan peyi a ka founi pou voye vann ak lòt peyi. Se eseye vann anpil ak lòt peyi epi achte mwens nan men yo . Se bati sa nou bezwen daprè bezwen nou enonpa daprè jan lòt wè bezwen nou nan pwòp tèt pa yo.
Mwen pa ekonomis non, men mwen pa kwè nou dwe konsidere lanng kreyòl la tankou youn andikap nan devlopman peyi a.
Atansyon! Se limyè mwen ap chèche. Si gen mounn ki wè sa youn lòt jan yo kab toujou eklere mwen.
Men mwen ap kontinye kwè di tankou fè: kreyòl la, ki se lanng tout kretyenvivan Ayiti pale , se youn lasdatou nan devlopman peyi a , si yo konnen kijan pou yo fè li fè travay li, si yo devlope li tankou nou ap eseye fè li pale tout kalite koze sou fowòm lan jounen jodi a. Li gen pou li fè mèvèy.
Kreyòl pa gen limit se mounn ki pale li yo ki kab limite.
Ak onè respè Michel-Ange Hyppolite

Repons sou sijè sa: