Eske Bondye ka bat bravo lakontantman pou lenjistis

[ Kesyon Moun Mande Anpil ]

An repons a: Eske Bondye ka bat bravo lakontantman pou lenjistis Gifrants te ekri a,

jafrikayiti afiche mesaj sa, jou 31 Me 2000 a 22:39:32:

Onè, rèspè, frè Gifrants

Annou kontinye konbit brase lide a….

Ou ekri :

« Pou-w menm, labib-la ta konsène blan, e blan sèlman. Pou-w menm tou, ondirè ke relijyon blan-an sa ta yon bagay malen, e malen sèlman, ke zafè Bondje Blan-sa, sa ta yon bagay malefik. »

Okontrè! Mwen pa di, ni mwen pa kwè labib konsène blan sèlman. Poudayè anpil nan pèsonaj ki mansyone nan labib pa blan ditou. Men kisa mwen ekri osijè labib nan liv mwen an « Bib la se yon konpilasyon liv gason Jwif-Ewopeyen ekri epi kole-pyese pandan plizyè jenerasyon. Tankou tou bagay lèzòm reyalize, li gen bèlte, li gen erè, li gen manti. Bib la voye monte ideyoloji ekritè/kolepyesè tèks yo. Se sa ki eksplike li bat bravo lakontantman pou zak krabinay sou inosan, sitou fanm, ki pa fè pati menm kategori ak ekritè/kolepyesè li yo. Makdwèt gason blan Ewopeyen fè mikalaw nan Bib la.» VIV BONDYE! ABA RELIJYON! Paj 132. Konsènan koze relijyon blan an, li klè lè mwenmenm mwen analize travay relijyon Krisyanis lan sou latè, mwen remake plis zak maspinay pase aksyon lanmou. Kidonk, wi, mwen kwè relijyon krisyanis la, menm jan ak anpil lòt relijyon lèzòm kole-pyese se yon move zouti zonbifikasyon ak dominasyon etnosantrik. Konsènan « bondye blan » ou mansyone a, mwen pa rekonèt ekzistans okenn « bondye blan ». Sèl Bondye mwen rekonèt se sila ki kreyatè tout linivè a. Kidonk, li pa bondye blan, ni nonplis li pa yon blan ki se yon bondye. Dayè, tankou mwen toujou admèt sa, mwen pa menm azade-m imijine kisa Bondye tout bon an ta ka sanble si mwen te ka wè li ak de je ki nan tèt mwen yo.

Ou ekri :

« An nou klè sou yon bagay, Ansyen Tèstaman-an kontamine pa pretansyon Pèp Jwif, fristasyon Pèp Jwif devan mera y-ap
pase …Men sa pa vle di ke li pa genyen kèk verite ladan-li. »

Pozitif labib gen bon bagay ladan li. Menmjan ak majorite liv lèzòm ekri! Kit se konpilasyon Ansyen Testaman, kit se konpilasyon Nouvo Testaman, fokis la a chanje. Yo gen bèl pwezi, bon konsèy, bèl leson moral, vye komantè seksis, rasis, etnosantrik, kontradiksyon, lejann bèl mèvèy….kidonk…makdwèt MOUN!

Ou ekri :
« … Kelkeswa sa yon moun ka di, labib rete yon liv ki pale non sèlman de yon Gran Mèt, men sitou de Bondye, ki nan Paradi, e Gran Mèt-sa ki kreye nou menm ak linivè-sa, ki son ti pati tou piti, non sèlman nan setièm inivè kote n-ap viv-la, men tou yon ti zing si nou vle konsidere lè 7 sipè-inivè.»

Bon mwenmenm mwen pa konnen konbyen inivè ak sipè-inivè ki ekziste. Men, mwen konnen gen yon latriye liv listwa ak lòt zouti ki dokimante kilè yo te kole-pyese Bib yo. Depi sou epòk Pòl ak lòt Kreyatè relijyon Krisyanis yo bati sou do Jezi a rive sou epòk kounye a, san konte peryòd kle kote lanperè Konstanten te mete baz solid pou mit kretyen an pouse rasin ki solid. Koze sa yo se fè ki verifyab. Se pa revelasyon okenn ekstraterès banmwen, ni se pa opinyon pèsonèl pa mwen. Bib la se yon liv. Li ekri nan lang moun envante, nan peryòd kote moun te dokimante ekzakteman kilès, ki bò, nan ki kondisyon, sou lobidyans kilès sa te fèt. Kidonk, mwen pa wè rezon pou nan ane 2000 nou kite laperèz kontinye fè nou aksepte kakaje pou linèt. Dotanplis, moun ki vle louvri je yo gade kapab jwen yon dividal paj kote makdwèt moun parèt aklè nan labib. Kidonk koze « pawòl bondye » yo vle fè moun vale a, bliye sa! Bondye pa kapab bat bravo lakontantman pou zak kriminèl. Ni non plis li pa ka enpire moun bay manti. Labib fè toulede ak degi.

Ou ekri :

« m-ap di-w 2 zak ke Ginen-yo poze, e yonn nan aksyon-sa nan labib. Premye-a pa nan labib. Se Ginen-yo kite mande Gabryèl ak lòt gwo zotobre anlè-a, pèmisyon pou yo boule kadav Jezi apre li te finn mouri. Zak-sa te pran mwens ke 1 minit. (Frè an-we, sa pa te anpeche Jezi resisite.) Dezièm zak, yon Ginen te poze, se te louvri pòt prizon pou Sen Pyè. Se pa te yon "Anj di Sèyè" paske yon anj pa ka manyen zafè materyèl. Yon lòt zak mwen ka site ankò, se te yon Ginen ki te woule gwo wòch-la devan tonbo Jezikri pou Mari, ak lòt fanm-yo t-ay
obsève ke Jezi te resisite. W-ap pay di-we ke si Ginen boule kadav-la, pa gen kò pou moun wè. Ebyen, frè an-we, Barak-la te resisite tèt-li avèk yon lòt ko, ki yon lòt sibstans yo rele "morontia", se sak fè apot-yo pa te ka rekonèt li, e se sèlman lè li poze sèten zak, e di sèten pawòl, yo te rekonèt ke se li.»

Kote ou jwenn koze sa yo? Poukisa se yon ti gwoup sekrè ki okouran revelasyon bèlmèvèy sa yo?

Noumenm ki pa okouran, se pa pitit Bondye nou ye tou? Se pa jalouzi non m ap fè men mwen fè alèji ak tout mistifikasyon. Kit se sa ki sòti nan Vodou, nan Krisyanis osnon lèzòt yo.


Ak respè,


Jafrikayiti

« Bondye kreye moun, moun kreye relijyon, vwala se relijyon ki vle montre moun Bondye » - Viv Bondye! Aba Relijyon ! paj 134


Repons sou sijè sa: