An repons a: Viv Bondye ABA Relijyon Guy Antoine te ekri a,
jafrikayiti afiche mesaj sa, jou 04 Jwen 2000 a 09:15:03:
Respè Guy ak tout zanmi fowòm nan,Se yon bagay ekstraòdinè jan Guy abòde kesyon lavant liv la nan yon optik sèvis ki prèske ale alankont enterè Windowsonhaiti pou li mande mwen klarifye ki lòt mwayen moun kapab kòmande liv la.
Monchè Guy nou poko janm rankontre bab pou bab men, anverite ou se yon atravè konstans ou montre nan pozisyon fran Ginen ou tojou adopte sou entènèt la, se tankou mwen gen yon etènite depi mwen gen chans fè lakonesans ou. Epi se rankont moun ki bay vibrasyon pozitif sa yo ki fè mwen pap janm sispann di Viv Bondye! (paske pitit li yo reflete bèlte karaktè li).
Bon, vye frè, lè mwen li mesaj ou a, mwen gen lenpresyon ou panse vizitè fowòm nan ta ka gen lakrentif osnon rezon ki dekouraje yo achte liv la palentèmedyè gajma. Kòmkwa si mwen bay mwayen kòmande liv la dirèkteman nan men mwen sa ap fè lavant la vanse pi byen. Èske se sa ou panse Guy?
Si se sa, kite mwen di ou - sa ta grav anpil epi li pa t ap lojik ditou paske jiskaprezan, mwen kwè Windowsonhaiti reprezante yon fòs pozitif nan espas Ayisyen an epi pèfòmans li se pa kichòy pèsonn kapab mete an dout.
Okontrè, mwen kwè sa ki eksplike liv yo pa vann rapid rapid se gendwa, 1)paske anpil moun poko konfòtab ak kesyon kòmande liv palentèmedyè entènèt la. Poutan se yon fòmil yo ta dwe kòmanse aprann, si yo pa vle rete dèyè kamyonèt la nan jan aktivite ekonomik ap dewoule nan syèk modèn sa a.
2) paske, an jeneral nou poko bay Ayisyen parèy nou abitid achte liv ki eksprime refleksyon Ayisyen parèy yo 3) kanmarad ki vizite fowòm nan on ti jan timid nan domèn aksyon konkrè. Poudayè, menm pou eksprime opinyon, ou remake menmsi gen anpil vizitè, se senpman dezoutwa kanmarad ki pran chans mete tèt yo deyò poste mesaj.
Kidonk, kouzen «Guy, gen anpil rezon fondamantal, daprè mwenmenm ki fè lavant liv la pa fèt rapido presto. Men, anverite, 500 zan entoksikasyon mantal pa touye nou, se pa detwa zan rete tann anvan laverite blayi toupatou ki pral depafini nou. Dotanplis, pa bliye objektif mwen se pou brase lide a tanmen. Mwen sèten nan kèk mwa pral gen lòt liv ki pral sòti sou sijè a, konsa plis limyè ap blayi, plis diskisyon ap fèt.OPu pa ka imajine ou jan mwen kontan li reyaksyon gadyèn nan. Bò kote pa mwen se menm eksperyans lan, gen moun ki achte liv la, ki pa t janm gen abitid li kreyòl, ki kretyen pratikan fidèl orandevou chak dimanch, chak samdi...ki temwanye kijan yo pa janm sispann siwote liv la, li li, reli li epi brase lide ak lòt kanmarad sou sijè yo.
Monfrè, mwen pa enkyete ditou pou lavant liv la, ni pou difizyon mesaj la.
Vizitè fowòm nan ki Okanada ka gen plis avantaj kòmande liv la dirèk dirèk nan men mwen palentèmdye mesaj imèl pou yo epanye konvèsyon lajan an, men, mwen ta pito yo idantifye nan mesaj yo ke se nan WOH yo te aprann ekzistans liv la. Konsa, pou moun ozetazini sa pa fè okenn diferans si yo kòmande liv la ak mwen dirèk dirèk onson ak WOH.
Detoutfason, koze kòb la san enpòtans la a akòz ti volim toupiti n ap pale la a yo.
Sa ki ankourajan anpil, se mesaj tankou pa Lunine api Mozart lan ki li liv la epi fè kòmantè sou li pou alimante brase lide a. Mwen ta kontan anpil, si kanmarad ki gen pati nan liv la yo pa renmen osnon yo pa fin dakò ak yo, osnon ki ta vle wè plis presizyon, plis referans elatriye...pou yo ta lage kòmantè sou nou.
Mwen pap gen pwoblèm resevwa kritik epi eseye fè sa mwen kapab pou reponn..
Annou kontinye bouske limyè ansanm...
respè,
Jafrikayiti