Yon lòt kesyon sou Kreyòl

[ Kesyon Moun Mande Anpil ]

Guy S. Antoine afiche mesaj sa, jou 07 Jwen 2000 a 08:25:13:

Premye kesyon mwen te poze sou Kreyòl la tounen nan yon diskisyon sou metafizik, sou kontribisyon ras nèg la, sou wòl lang Ayisyen an nan devlopman peyi a. Ti kochon, gwo san. Fòk mwen poze yon dezyèm kesyon pou mwen wè si m va trouve tout bèl richès sa yo ankò. Men kesyon an:

- Eske gen yon diferans nan dyalek rejyonal yo ki ta pòte yon pati moun ekri "manje kuit" e yon lòt pati moun ekri "manje kwit"? Eske "ui" ak "wi" gen diferans nan yo ousnon yo egal-ego?

Kòm mwen sou woulib, m ap tou pwofite mande de lòt kesyon:

- Si gen yon bon valè moun ki lò y ap pale, yo di "duri" e yo pa di "diri", eske sa vyole òtograf ofisyel la lò yo ta va ekri "duri" nan plas "diri"? Mwen vle kwè sa, paske son "u" nan franse a pa rekonèt ofisyèlman nan lang kreyòl la. Men bagay sa banm yon ti mal tèt, paske ke lò ou di "manje kuit", eske efektivman se pa "manje ku-it" ou di? "KU - IT". Eske pou yon nanosekond bouch ou pa fòme son "U" a anvan son "I" an pase melanje avè l, pou li fòme son "UI" a? Eske gen verite nan sa tout bon lò nou di son "U" a pa ekziste nan Kreyòl? Pou tout Kreyolis k ap li sa, fòk mwen di mwen dakò 100% avèk yon estanda pou ekri lang lan pou tout Ayisyen ka rive li li epi ekri li. Se pa pwoblèm mwen sa. Se yon ti lojik sèlman m ap chache.

- Banm yon ti degi: nan Òtograf Ofisyèl lang kreyòl la ki nan achiv REKA a, yo ekri konsa: "Wo, Wò, Won, Wou kapab ekri konsa tou : Ro, Rò, Ron, Rou". Men pou ki sa pou yo pèmèt sa? Mwen kwè sa kapab kreye anpil konfizyon. Si se senplifikasyon moun yo ki ekri standa yo t ap chache, pou ki sa yo chache l yon bò (lò yo elimine son fransize "u" a) epi yo pa chache l lòt bò (lò yo pa elimine 'ui' ak 'ro', 'rò', 'ron', 'rou')?

Mezanmi, mwen pa lengis, epi konprann byen se limyè m ap chache. Kounyè a si nou vle diskite tout manyè de filozofi ak metafizik, mwen pa gen pwoblèm nan sa, paske plis nou patisipe plis sa fè mwen plezi.



Repons sou sijè sa: