An repons a: Yon lòt kesyon sou Kreyòl Gifrants te ekri a,
Guy Antoine afiche mesaj sa, jou 07 Jwen 2000 a 17:16:48:
Monchè Gifrants, mwen pa doute ou se bon nèg Okap. Sak fè mwen di mwen te sezi lò ou di sa, se paske mwen te fè yon move sipozisyon odepa. Kòm mwenmenm mwen pa t janm abitye tande son "-we" avèk "-wen" an, mwen te panse se nan yon zòn peyi a ou te soti ke mwen pa te abitye avèk li, paske chak zòn nan peyi a gen pwononsyasyon rejyonal yo. Lò ou di mwen se moun Okap ou ye, mwen sezi paske vin wè nou grandi nan menm zòn e ou itilize son ke nonsèlman mwenmenm mwen pa te janm itlize, men mwen pa t janm tande pèsonn itilize yo. Se sa ki fè mwen sezi, se pa nan betiz mwen t ap pase chache pèsonn. Dayè si ou panse sa, ou pa abitye avè m ditou.Mwen pa t ap kesyone entegrite ou nonplis. Mwen regrèt se konsa ou pran kòmantè mwen yo. Mwen se moun ki kesyone jiskaske mwen trouve zo nan kalalou. Se defo pa mwen sa, padone mwen. Mwen te poze ou kesyon an yon premye fwa, yon dezyèm fwa, ou pa te reponn mwen dirèkteman, paske siman ou pa te konprann kesyon mwen te poze yo. Kidonk, fwa sa, mwen chache poze kesyon yo nan yon fason pou ou kapab konprann mwen tout bon, san konfizyon. Eske se derespètan mwen t ap fè pou otan? Mwen regrèt se konsa ou pran sa, paske se pa t entansyon mwen ditou. Mwen pa janm chache derespekte nèg mwen pa konnen, pou dan griyen. Sa pa nan karaktè mwen.
Monchè, mwen kontan ou fini pa reponn kesyon mwen yo sou "-we" avèk "-wen" dirèkteman, jan mwen toujou di chak jou Bondye mete mwen aprann yon lòt bagay. Si gen lòt moun ki kapab ranfòse sa ou sot di yo, mwen ta byen kontan. Se pa paske mwen pa fè ou konfyans, se paske nan tout domèn syantifik, tout opsèvasyon anpirik fèt pou yo ka repete e fòk yo ka verifyab tou. Se sou domèn lenguistik la mwen te chita, se pa t sou yon domèn pèsonèl. Mwen wè ou pran sa yon lòt jan. Mwen regrèt sa anpil, men ou ajoute pi plis sou sa mwen te di a ke mwen te di vrèman.
Mwen espere w a va rekonèt sa.
Jan mwen di anlè paj la: "Respè ak solidarite pou nou tout". Pèsonèlman, mwen toujou chache trase ekzanp sa a nan fowòm nan.