An repons a: Eleksyon nan peyi nou Guy S. Antoine te ekri a,
Michel-Ange Hyppolite afiche mesaj sa, jou 18 Jwen 2000 a 12:15:03:
Alo Guy jeneralman mwen pa renmen foure bouch mwen nan koze politik Ayiti, paske se pa sa mwen pral di sou granchemen an ki pral pote youn chanjman vrèmanvre nan briganday ki ap fèt anndan peyi a. Men, sa mwen ta kab di, se chèche youn mwayen pou koze sa yo ou ekri sou koze eleksyon an rive rantre anndan peyi a epi rive tou nan men aktè politik nou yo. Osnon èske ou gen youn mwayen pou ou simaye analiz sentèz sa a ou ekri la a toupatou pou nou wè nan ki fason bèl pawòl sa yo ou ekri a ka rive jwenn zòrèy pou koute yo, je ki pou li yo epi bouch ki pou simaye yo toupatou.Se nan fason sa a nou va rive fè ledikasyon sivil ak politik epi se nan fason sa a tou nou va rive pote koutmen pa nou nan chanjman sosyal ak politik ki dwe fèt anndan peyi nou an.
Mwen pa kwè se nan pale ant noumenm la a sou granchemen an nou ap janm rive pote kole kòrèkteman nan kesyon Ayiti a.
Tanpri pa louvri deba sou sa mwen di la yo. Pi bèl repons nou ta kab ban mwen, se pou nou ta di mwen ki efò nou pral fè osnon nou te fè, pou analiz sentèz Guy Antoine lan rive jwenn youn lasibab espas anndan peyi a. Tankou mwen toujou di li: se aksyon ki mennen chanjman. Gen mounn ki kab di pouki mwen pa kòmanse bay ekzanp lan epi voye enfòmasyon Guy Antoine lan ale toupatou? Mwen pa matou nan sistèm kominikasyon elektwonik lan. Sepandan, si gen youn bagay mwen kab fè se voye li nan fòm imèl bay zanmi mwen genyen anndan Ayiti yo.
Annou sèvi ak pisans kominikasyon elektwonik lan pou nou pote limyè lakay.
M'ale
Michel-Ange Hyppolite
- Eleksyon nan peyi nou Michel-Ange 18/6/2000
- Eleksyon nan peyi nou Mozart Saintvil 20/6/2000
- Eleksyon nan peyi nou Guy Antoine 19/6/2000
- Eleksyon nan peyi nou Michel-Ange 19/6/2000