An repons a: Lagè Rat Mòde Soufle pwazon rat te ekri a,
jafrikayiti afiche mesaj sa, jou 19 Jwen 2000 a 21:45:35:
Monchè Pwazon Rat,Daprè sa mwen tande beton an te cho anpil jodi lendi a. Te gen mesaj klè ki te pati devan pòt kay rat yo okipe sou boulva nou an. Men mwen ta swete lidè yo itilize entèlijans yo pou pwazon rat la pa tonbe nan manje moun. Sa vle di: Koze kraze brize nan lari a pa yon bon estrateji, si ou kite lenmi rekipere li pou li itilize kont ou. Pa bliye chak jès ou fè sou siveyans. Laboratwa ap fè ovètay.
Gendelè, tan pou ou sèvi ak pwazon rat, pito ou dirije rat la jouk li tonbe nan twou watè pou kont li.
Bon, kisa ki sa ojis. Jounal blan yo di se Lavalas ki t ap fè presyon sou Leon Manus pou li siyen rezilta eleksyon yo - jouk sa lakòz malere a kouri chape poul li. Agence Haitienne de Presse limenm rapòte, okontrè, byen ta nannuit se blan yo menm ki t ap fè gwo presyon menas sou Manus pou li pa ofisyalize rezilta yo jan li te deja pibliye yo a.
Antouka, rezilta a klè Prezidan KEP la pati, 2 lòt manm demisyone, gen yon lòt ki nan mawon?, rès ki rete yo jis ase pou kowòm. Kidonk, eleksyon yo posib toujou men yo frajil anpil, menm jan ak lavi rès manm KEP la. Mezanmi tanpri,mwen espere leta Ayisyen ap konprann nesesite pou li bay manm restan yo tout sekirite ki posib. Atansyon pa kapon. DYAB sa yo se pa ti dyab listwakont, se dyab ki gen AK47, UZI ak tout kalite vye zam destriksyon ki pa fè bak devan sipèstisyon pale anpil. Anplis yo gen kriminèl tout koulè tout plimaj yo kapab lage nan lakou a, lè yo pipito pou fè deblozay pete epi apresa yo pran pòz yo sezi, yo "Sorry", yo "disturbed", yo "sympathise"....
BAY KEP la bonjan SEKIRITE tanpri. Pwazon rat pa sifi. Mobilize Lapolis, CIMO,Pèp vanyan, Minis lajistis la si sa nesesè... men bay KEP la sekirite. Nou fatige wè bèl Te Deum. Okontrè ankèt sou sansinay Jean Dominique la lè pou li pote rezilta...Pèp Ayisyen rete mobilize rèd san vyolans. Menmsi yo pwovoke nou pa fè reyaksyon vyolan. Okontrè, si sa posib transfere responsablite manifestasyon yo nan dyaspora. Sitou New-York ak Washington kote Ayisyen kapab fè bon jan leve kanpe pou mete tout kakachat deyò.
Pa bay "chimè kravate" okazyon yo kole etikèt"chimè" sou do malere moudebyen k ap lite pou lavi miyò.
Atansyon:Chimè se pa nèg Kafoufèy, Bèlè ak Site Katon. Chimè, se nèg (tout katye) ki pa konnen se nèg yo ye epi k ap pran avyon al chita nan fouk Jesse Helms ak tout lòt rasis KKK yo pou mande moso pouvwa restavèk sou do pwòp frè ak sè yo.