General / History / Jobs&Other fowòm yo: yon envitasyon

[ Kesyon Moun Mande Anpil ]

Guy S. Antoine afiche mesaj sa, jou 14 Jiyè 2000 a 12:20:57:

Mwen envite nou enskri kòm manm nan General Forum avèk History Forum mwen ofri nou kounyè a. Se yon gwo chans mwen pran, paske mwen wè patisipasyon menm nan fowòm kalite tankou Fowòm Kreyol la fèb anpil. M ap mete zouti nan men nou pou nou kapab defann valè peyi nou avèk kilti nou sou granchimensawa sa. Men mwen rekonèt li pa bèl pou sit la, lò mwen fè yon efò konsa epi konpatriyòt mwen yo pa okipe ditou sa mwen chache fè pou yo. Pou di laverite, si mwen te baze sou sa, gen lontan Windows on Haiti ta va fèmen pòt li. Men mwen pito kontinye vale desepsyon mwen, epi kontinye feraye jiskaske yon jou anpil nan nou a wè yon nesesite pou fè jefò pou nou reponn apèl la, epi patisipe nan sèvis m ap ofri nou yo, gratis ticheri. Mwen pa kapab dekouraje menm si pafwa dekourajman vle anvayi mwen. M espere se pa travay Bouki m ap plede fè tout tan.

Ale nan General Forum ak History Forum yo, epi fè yo kòmanse bouje. Mwen menm ma va ajoute tèks avèk opinyon nan yo tou. Men nou pa bezwen tann mwen fè sa pou nou rantre ladan. Epi gen Jobs&Other forum nan tou ki pi espesyalize pase lòt yo. Si nou gen djòb osnon anons conferans nou ta vle fè piblisite pou yo, mwen envite nou pran avantaj fowòm sa tou.

M ap toujou konte sou nou, sou profesyonèl yo, epi sitou sou lajenès la, etidyan lekòl yo, pou yon jou nou reveye epi nou vini konprann enpòtans sa yo rele solidarite pou pèp Ayisyen an. Se pa nan silans ouswa kritik efò lòt n ap jamè reyalize anyen ki bon. Se reyalize pou nou reyalize se efò tout moun ki konte, efò tout moun e sa vle di oumenm tou k ap li pawòl sa yo. Si ou pa fè, pa atann ou aske se yon lòt ki pral fè. Kòmanse pa bay ekzamp lan.

Repons sou sijè sa: