Emmanuel VEDRINE afiche mesaj sa, jou 18 Jiyè 2000 a 17:05:32:
KONBIT KREYòL POU SEKLE JADEN RECHèCHSe yon konbit ki mande potorik gason, gason kanson ki prepare e k ap fè fouy tout bon nan pwòp lang yo ak nan lang zòt alafwa pou pote bon kichòy nan lakou rechèch ki pa ret ak rechèch. Sa va ede yon seri fouyadò (natif ou pa pou panse a metòd rechèch nan venteyinyèm syèk) .
Se sa k fè l enpòtan pou gen natif k ap fè travay de baz nan pwòp lang yo [kèlkeswa lang nan]. Jules Faine, Yves Dejean, Michel DeGraff, Pierre Vernet... se kèk ekzanp pou jenerasyon lakay ki nan kouchèt e sa k gen pou wè koulè lavi premye fwa nan syèk tounèf la.
Chimen an long men ak lespwa nou koumanse wè gonmbo. Nou va pran bonnèt lakansyèl pandan l ap pran kèk gòjèt dlo pou mete sou richès nou. Nan travay di nou tanmen, nou pa p bezwen wè trip fwomi pou n fè jou louvri pou lòt rechèch sou Ayiti.
Malgre lavi ka ban n payèt pafwa men fò n pa jan m bouke mache nan granchimen l malgre pikan kwenna pafwa ki bay tetanòs. Men nawè n se fizi kout ki tire lwen, konsa n va netwaye sa nou wè lwen pandan n ap foukan chimen.
Konbit la va kontinye pouse kabwèt rechèch li tanmen, aplike estrateji ak bon konprann pou vin pi maton kòm fouyadò natif chak jou solèy klere nawè l pandan souf nèg poko koupe, epitou n va aplike sajès nan travay n ap fè pase gen yon seri moun lwa lògèy danse nan tèt yo (apre yo fin pibliye kèk koze men yo pa janm viv Ayiti pou etidye kreyòl, fason natif pale) tankou lè lwa mandeng moute chwal li nan marinèt jou madi. Zòt jouk al Ayiti Tonma kote l dodomeya nan yon otèl; li bwè gwòg li, pran règ plezi nan play elatriye epi tounen l tounen li di l espesyalis nan lang natif papa Desalin, nan istwa ak kilti Ayiti Kiskeya Boyo nan inivèsite lòtbò dlo. Men pou nèg lestonmak wòklò k pa dijere tout afiba Mache Anba, n a bay yon bòk pou dekonstipe tout sa k fè movèz endijesyon.
Pawoli sewòm pou tout ounsi sèvèl wòwòt k ap fè laviwonn anba perestil rechèch kreyòl,(Emmanuel W. Védrine)