Nouvo Fòma Sit REKA

[ Kesyon Moun Mande Anpil ]

An repons a: Nouvo Fòma Sit REKA Nekita te ekri a,

Guy Antoine afiche mesaj sa, jou 26 Jiyè 2000 a 08:34:11:

Nekita, mwen kontan ou fè yon kòmantè sou sistèm rechèch mo-kle mwen fèt mete nan fowòm lan. Mwen travay kont mwen pou mwen fè li mache, m espere e mwen ta renmen konnen si sèvis rechèch sa itil pou itilizatè fowòm lan. Si nou gen yon ekzanp konkrè jan nou te itilize li, ki te soti itil pou nou tout bon, fè mwen konnen pou mwen kapab kontinye chache ki lòt fason ankò Fowòm Kreyòl kapab vin yon pi gwo zouti toujou.

Men yon kesyon ou pa te poze direkteman, men ki merite nou elabore sou li: Eske nou kapab reponn yon mesaj ki pase nan achiv deja?

Wi, men sa genyen gwo limitasyon ladann soupwendvi vizibilite repons a mesaj la. Ou pap wè repons lan sou paj prensipal Fowòm nan, ni ou pap wè li tou sou paj achiv kote sijè a parèt la. Se de jan sèlman ou va trouve repons sa yo, e toulede se nan fouye:

1) Si ou ale vizite sijè a nan achiv la, lò ou va gade pa anba chak atik ou va trouve tout repons moun te fè ba otè a, e dezyèm ak twazyèm (elt.) jenerasyon repons ki te fèt sou sa tou, ke repons yo te fèt anvan mesaj la pase nan achiv, ke li te fèt annapre.

2) Epitou, si ou te pase nan sistèm rechèch la pou ou te tonbe sou sijè prensipal la, ou va trouve tout sa ki te ekri sou mo-kle ou anplwaye a, ke repons yo te fèt anvan mesaj la pase nan achiv, ke li te fèt annapre.

Kidonk, sistèm rechèch la kapab vin itil pou ede nou dekouvri plis bagay toujou sou yon sijè ki te diskite deja, menm lò li gentan pase nan achiv. Men si ou jije repons ou vle fè a merite tout moun wè li imedyatman san yo pa bezwen rantre nan sistèm rechèch la, e san yo pa bezwen vizite achiv yo nonplis, se yon sèl jan ki pratik ou kapab fè sa:

Ekri yon mesaj tounèf sou sijè a. Ou toujou kapab fè referans a sa ki te ekri deja nan achiv yo, pou moun ki enterese kapab pousuiv nannan diskisyon an, san yo pa oblije rekòmanse tout diskisyon an ankò.

Se pou rezon sa yo, mwen te panse li nesesè pou mwen etabli sistèm rechèch nan Fowòm Kreyòl la.

Finalman, ou te mande kilè mesaj yo pase nan achiv? Mwen pankò genyen yon pwotokòl byen detèmine sou sa, men jiskaprezan se yon sistèm manyèl - li pa otomatik. Sètadi, pou lenstan mwen pankò gen mwayen teknik pou mwen ta fè chak mesaj pase nan achiv baze sou ki dat yo te ekri. Pou mwen fè sa, sa ta mande anpil travay ak anpil tan pou mwen resi reyalize sa, mwen pa genyen resous pou sa. Sèl bagay ki gide mwen, se lè paj prensipal la kòmanse twò long. Lò sa, mwen pase paj la nan achiv. Se konsa mwen te sètoblije kreye yon achiv espesyal pou Kouzen Vedrine paske li te parèt avèk 35 mesaj youn sou lòt. Paj prensipal la pa kapab long anpil, paske sa kapab lakòz erè teknik nan manipilasyon paj la. Kidonk, mwen oblije ap voye je sou li tout tan.


Repons sou sijè sa: